SOSİUM

Dövlət qulluğunda inzibati icraçı vəzifələr üzrə müsabiqənin müsahibə mərhələsinə qeydiyyat başa çatıb
12 FEVRAL
181

Dövlət qulluğunda inzibati icraçı vəzifələr üzrə müsabiqənin müsahibə mərhələsinə qeydiyyat başa çatıb

2018-02-12 14:56:00

Dövlət İmtahan Mərkəzinin (DİM) inzibati icraçı (B növ) vəzifələr üzrə dövlət qulluğuna qəbul üçün elan etdiyi müsabiqənin müsahibə mərhələsinə qeydiyyat başa çatıb.

DİM-dən  verilən məlumata görə, müsahibəyə inzibati vəzifələrin 5-7-ci təsnifatlarına uyğun olan 1126 vakant inzibati icraçı vəzifə (B növ) təqdim olunub.

Yekun məlumata əsasən, 77 dövlət orqanında olan vakant vəzifələr üzrə 1925 müraciət qeydə alınıb.

Dövlət orqanları arasında təqdim olunan vakant yer və müraciət edənlərin sayına görə ən yüksək müsabiqə vəziyyəti (1 vakant yerə düşən ərizələrin orta sayı) Tarif (qiymət) Şurasının Katibliyi (11), Prezident yanında Vətəndaşlara Xidmət və Sosial İnnovasiyalar üzrə Dövlət Agentliyi (9.94), Maliyyə Nazirliyi (8.67), Təhsil Nazirliyi (8.5) və İqtisadiyyat Nazirliyində (8.06) olan vəzifələr üzrədir.

Bəzi vəzifələr üzrə müsabiqə vəziyyəti çox yüksəkdir. Bu da həmin vəzifələrin tutulmasında rəqabətin yüksək olacağını göstərir. 1 vakant yer üçün 30 dan yuxarı müraciət qeydə alınan vəzifələr aşağıdakılardır:

Mingəçevir regional “Asan xidmət” Mərkəzində aparıcı məsləhətçi (müraciət edənlərin sayı - 44 ), Quba “Asan xidmət” Mərkəzində aparıcı məsləhətçi (müraciət edənlərin sayı - 38), Mingəçevir regional “Asan xidmət” Mərkəzində böyük məsləhətçi (müraciət edənlərin sayı - 35 ), Quba “Asan xidmət” Mərkəzində böyük məsləhətçi (müraciət edənlərin sayı - 33), İqtisadiyyat Nazirliyində məsləhətçi (müraciət edənlərin sayı - 32), Əmlak Məsələləri Dövlət Komitəsində məsləhətçi (müraciət edənlərin sayı - 32) vəzifələridir Digər vəzifələr üzrə müsabiqə vəziyyəti ilə buradan tanış ola bilərsiniz

Lakin 77 dövlət orqanından 31-də (40.26%) vakant olan vəzifələr üzrə heç bir namizəd qeydiyyatdan keçməmişdir.

Təqdim olunan vakant vəzifələr üzrə müsahibədə iştirak etmək üçün müraciət qeydə alınmayan dövlət orqanları aşağıdakılardır:

Standartlaşdırma, Metrologiya və Patent üzrə Dövlət Komitəsi; Milli Televiziya və Radio Şurası; Gəncə, Şəki Apelyasiya Məhkəmələri; 1 saylı Bakı İnzibati-İqtisadi Məhkəməsi; Şirvan, Şəki İnzibati-İqtisadi Məhkəmələri; Füzuli, Tərtər Rayon Hərbi Məhkəmələri; Ağdaş, Ağstafa, Astara, Cəlilabad, Füzuli, Göyçay, Göygöl, Hacıqabul, Kəlbəcər, Laçın, Lənkaran, Qazax, Saatlı, Salyan, Şamaxı, Şəki, Şəmkir, Şirvan, Ucar, Xaçmaz, Yardımlı, Yevlax Rayon məhkəmələri.

Müsahibəyə ən çox vakansiya təqdim etmiş Kənd Təsərrüfatı Nazirliyində də vəzifələr üzrə (451 vakant vəzifə) müsabiqə vəziyyəti (0.12) aşağıdır.

Xatırladaq ki, namizədlərlə müsahibələrin keçirilmə qrafiki və nəticələri DİM-in internet portalında elan ediləcəkdir.

Elan olunmuş müsahibələrdə müraciət qeydə alınmayan, eləcə də digər vakant vəzifələrin tutulması üçün yaxın günlərdə yenidən müsahibə elanları veriləcəkdir. Artıq sertifikat əldə etmiş, həmçinin 18 fevral 2018-ci il tarixində dövlət qulluğunda inzibati icraçı (B növü) vəzifələr üzrə müsabiqənin test imtahanından uğur əldə edənlər bu müsahibələrdə iştirak üçün qeydiyyatdan keçə biləcəklər.

 

© Materiallardan istifadə edərkən hiperlinklə istinad olunmalıdır
  • $ USD
    1.7000
  • € EUR
    2.0016
  • ₽ RUB
    0.0276