ƏMLAK

“Tikinti şirkətləri görünməmiş PR kampaniyasına başlayıb”
25 APREL
1506

“Tikinti şirkətləri görünməmiş PR kampaniyasına başlayıb”

2016-04-25 10:14:00

“Artıq mənzil bazarındakı qiymətlər dekabr devalvasiyasından sonrakı yeni şəraitə uyğunlaşıb. Bu belə də olmalıdır. Çünki artıq 4 ay vaxt keçib”. Fins.az xəbər verir ki, bunu ekspert Rəşad Əliyev daşınmaz əmlak bazarındakı vəziyyəti şərh edərkən deyib.

“Bu müddət ərzində şəhərin zonaları, bazarın seqmentləri üzrə qeyri-bərabər qiymət dəyişikliyi müşahidə etdik. Bazarda bu müddət ərzində aktivlik də çox dəyişkən oldu. Son 4 ay ərzində aktivliyin ən pik həddi fevral ayında müşahidə edilmişdir ki, bu da yanvar-fevral aylarında bank sektorundakı böhranın pik dövrünə təsadüf etdi. Bu dövrdə bank depozitlərindəki vəsaitlərin bir hissəsi daşınmaz əmlak bazarına yönəldi. Son 1-2 ayda bazarda hər hansı istiqamətdə qiymət dəyişikliyi gözə dəymir. Bu isə bazarda sabitliyin olmasına işarədir” – deyə o, qeyd edib.

Ekspertin sözlərinə görə, hazırda qiymətlərin baha və ya ucuz olması mübahisəli mövzudur: “Ancaq görünən odur ki, qiymət azalması 2014-cü ilin payızından başlayıb. Bu dövrdə əhalinin dollarla ifadə olunmuş gəlirlərinin həcmi faiz nisbətində daşınmaz əmlakın qiymətlərindən daha çox düşüb. Bu ona işarə edir ki, qiymət azalması bazarda yetərli səviyyədə baş verməyib. Bunun əsas səbəbi əhalinin sərəncamında olan sərbəst vəsaitlərin (xüsusən bank depozitlərindən) müəyyən dövrlərdə bazara axması olub”.

Ekspert hesab edir ki, 2016-cı il dövlət ipoteka kreditləşməsi proqramı üzrə çox passiv ildir: “Kreditləşmə demək olar ki, yox səviyyəsindədir. Yanvar-fevral aylarında cəmi 800 min manat kredit verilib. Ancaq İpoteka Fondunun bazardakı passivliyinin bazara ümumiyyətlə təsiri olmayıb. Çünki, bank sektorundan yanvar-fevral-mart aylarında daşınmaz əmlak bazarına gələn pulun həcmi İpoteka Fondunun illik kreditləşmə məbləğindən bir neçə dəfə çox olub.

Hazırda diqqət mərkəzində olan bir neçə amil var ki, bunlar gələcəkdə bazara psixoloji təsir də bilər. Onların bəzilərinin qiymətlərə müsbət, digərlərinin isə mənfi təsirləri gözləniləndir. Məsələn, neftin qiymətinin gələcək artımı (BRENT markalı neftin qiyməti artıq 45-46 dollar səviyyəsinə çatıb ) bazara müsbət psixoloji təsir göstərə bilər. Sosial evlərin tikintisi və söküntü işlərinin anonsu (sökülən binaların yerində daha çox mənzilli binalar tikiləcək) isə psixoloji cəhətdən mənfi təsir edir.

Çünki, bu bazara əlavə mənzillərin daxil olmasını nəzərdə tutur. Sözsüz ki, psixoloji təsirin əsasları puç olduqda onların təsiri də ötəri olur. Əlavə olaraq bazarda tikinti şirkətlərinin fəaliyyəti də nəzərə çarpacaq dərəcədə yüksəkdir. Hələ heç vaxt tikinti şirkətləri bu qədər PR və reklam kampaniyaları keçirmirdilər”.

Mənbə: Modern.az

© Materiallardan istifadə edərkən hiperlinklə istinad olunmalıdır
+12°C
  • $ USD
    1.7369
  • € EUR
    1.8716
  • ₽ RUB
    0.0274