KƏND TƏSƏRRÜFATI

Xaçmazlı təsərrüfatçılar çiyələk yığımına hazırlaşır
14 MAY
212

Xaçmazlı təsərrüfatçılar çiyələk yığımına hazırlaşır

2019-05-14 09:45:00

Respublikamızın əsas tərəvəzçilik rayonlarından sayılan Xaçmazda may ayının ikinci ongünlüyündən başlayaraq mövsümün ilk məhsulu sayılan çiyələyin yığımına başlanılacaq.

Fins.az xəbər verir ki, təsərrüfatçılar əsasən çiyələyin Avropadan gətirilən növlərini becərməyə daha çox üstünlük verirlər. Bunun əsas səbəbi həmin növ çiyələklərin həm məhsuldar, həm də satış üçün əlverişli olmasıdır.

Hər il Xaçmazda 100 hektara yaxın çiyələk əkilir. Bu sahələrdən 150 tona yaxın məhsul yığılır.

Beş hektar sahədə çiyələk becərən təsərrüfatçı Rəşad Ağaşirinov bildirib ki, yaz aylarında havaların nisbətən soyuq keçməsi çiyələk yığımını 10-15 gün gecikdirsə də, məhsuldarlıq yaxşıdır.

“Çiyələk bitkisi xüsusi aqrotexniki qulluq tələb edir. Sahəni alaqdan qorumasan məhsul almaq mümkün deyil. Biz suvarmanı damcı üsulu ilə həyata keçiririk. Sahələrə əsasən üzvi gübrələr verilir. Bununla da çiyələk həm dadlı olur, həm də tağdan dərdikdən sonra daha uzun müddət saxlamaq mümkündür”, - deyə R.Ağaşirinov söyləyib.

Bir ay davam edəcək yığım zamanı əldə olunan məhsul əsasən yerli bazarlarda satılacaq.

Bütün giləmeyvələr kimi, çiyələk də insan orqanizmi üçün faydalıdır. Ruhdan düşməmək, daim yaxşı əhval-ruhiyyədə olmaq üçün alimlər müntəzəm olaraq çiyələk yeməyi məsləhət görürlər.

© Materiallardan istifadə edərkən hiperlinklə istinad olunmalıdır