NƏQLİYYAT

TIR-ların daşınmasında böyük artım
22 İYUL
164

TIR-ların daşınmasında böyük artım

2019-07-22 12:26:00

Bu ilin I yarısında Bakının Qaradağ rayonunun Ələt qəsəbəsində yerləşən Bakı Limanında ümumi yük, vaqon, TIR və konteyner aşırmaları, eyni zamanda sərnişin daşınması üzrə müsbət göstəricilər qeydə alınıb.

Bu barədə “Bakı Beynəlxalq Dəniz Ticarət Limanı” QSC-nin açıqlamasında bildirilir. 

Məlumatda deyilir ki, artımı şərtləndirən amillər “Bir Kəmər, Bir Yol” və Trans-Xəzər Beynəlxalq Nəqliyyat Marşrutu üzrə Azərbaycandan keçən yük həcminin çoxalması, eyni zamanda Orta Asiyadan kimyəvi məhsulların (karbamid, polipropilen, polietilen və sair) ixracının və Qara Dəniz və Avropa ölkələrindən Orta Asiya istiqamətinə daşınan sənaye və qida məhsullarının artması olub.

Əsas artım iri həcmli nəqliyyat vasitələrinin (TIR-ların) daşınmasında qeydə alınıb. Belə ki, TIR-ların sayı keçən ilin müvafiq dövrünə nisbətən 57,8% artaraq 15 009 ədəd olub. Bunlardan 11 372 ədədi (75,8%) Bakı-Türkmənbaşı-Bakı, 3 637 ədədi isə (24,2%) Bakı-Kurık-Bakı istiqamətində hərəkət edib. 

Konteynerlərin aşırılmasında keçən ilin müvafiq dövrü ilə müqayisədə 2019-cu ilin yanvar-iyun ayları ərzində 14 886 ədəd konteyner (TEU ekvivalentində) aşırılıb ki, bu da 37,7% artım deməkdir.

Bərə terminalında aşırılan vaqonların sayı 15,4% artaraq 25 344 (keçən ilin müvafiq dövründə 21 960 vaqon) ədədə çatıb. Bunlardan 11 636 vaqon (45,9%) Bakı-Kurik-Bakı istiqamətində, 13 708 (54,1%) Bakı-Türkmənbaşı-Bakı istiqamətində hərəkət edib.

Sərnişin daşınmasında hər iki istiqamətdə keçən ilin müvafiq dövrü ilə müqayisədə 0,1% artım qeydə alınıb və 19 984 nəfər təşkil edib. Ümumi yükaşırmanın həcmi 2018-ci ilin müvafiq dövrünə (1 960,4 min ton) nisbətdə 1,1% artaraq 1 981,3 min ton olub. Yükaşırmanın 85,4%-i (1 692,4 min ton) tranzit yükaşırmanın payına düşüb.

© Materiallardan istifadə edərkən hiperlinklə istinad olunmalıdır