BİZNES

İranın Maliyyə Nazirindən İranla Azərbaycan arasında ticarət barədə AÇIQLAMA
09 OKTYABR
108

İranın Maliyyə Nazirindən İranla Azərbaycan arasında ticarət barədə AÇIQLAMA

2019-10-09 15:03:00

Cari ilin ötən dövrü ərzində İranla Azərbaycan arasında ticarət dövriyyəsinin 70 faizdən çox artması qarşılıqlı əlaqələrin inkişafından xəbər verir.

Bu sözləri İranın İqtisadi İşlər və Maliyyə naziri Fərhad Dejpəsənd mətbuata verdiyi açıqlamasında deyib.

O bildirib ki, İranla Azərbaycan sığorta sahəsində əməkdaşlıq əlaqələrini genişləndirəcək və birgə investisiya fondu yaradacaq. Sığorta sahəsində əməkdaşlıq əlaqələrinin qurulması vətəndaşların və şirkətlərin iş qurmaq istəklərinə köməklik göstərəcək. Onların əmlakı və maliyyə vəsaitlərinə dövlətlər zəmanət verəcək. Bu isə qarşılıqlı sərmayə qoyuluşunu artıracaq.

F.Dejpəsənd iki ölkə arasında nəqliyyat sahəsində əməkdaşlığın davam etdiyini vurğulayıb. Qeyd edib ki, “Şimal-Cənub” Beynəlxalq Nəqliyyat Dəhlizinin əsas komponenti olan Qəzvin-Rəşt-Astara (İran)-Astara (Azərbaycan) dəmir yolunun çəkilişi davam edir. Bu yolun Qəzvin-Rəşt hissəsi istismara buraxılıb. Rəşt-Astara hissəsində isə işlər davam edir.

Onun sözlərinə görə, qarşıdakı iki ildə Rəşt-Astara yolunun tikintisi başa çatacaq və İranla Azərbaycanın dəmir yolu sistemləri birləşəcək. Bu dəmir yolunun istifadəyə verilməsi ilə hər iki ölkənin qeyri-neft sektorunun inkişafına əsaslı təkan veriləcək.

İranlı nazir onu da bildirib ki, dövlətlər arasında birgə beynəlxalq investisiya fondunun yaradılması məsələsinə baxılır.

Nazir bildirib ki, Azərbaycanda fəaliyyət göstərən İran müəssisələrinin sayında da artım müşahidə edilib.

“Bu gün Azərbaycan bazarında 1371 İran müəssisəsi fəaliyyət göstərir” - deyən F.Dejpəsənd yaradılan birgə müəssisələrə də toxunub. Qeyd edib ki, Neftçaladakı avtomobil zavodu fəaliyyətini uğurla davam etdirir. Zavodun istehsal etdiyi maşınlar yerli və xarici bazarlara çıxarılır. Bakı yaxınlığındakı Pirallahı qəsəbəsində əczaçılıq zavodunun tikintisi aparılır və bu birgə müəssisə də uğurla fəaliyyət göstərəcək. İran Azərbaycanı dost və qardaş dövlət hesab edir, iqtisadi əlaqələrin daha da genişlənməsində maraqlıdır.

 

© Materiallardan istifadə edərkən hiperlinklə istinad olunmalıdır