BANK

Maliyyə Palatasından əhaliyə müraciət
25 NOYABR
2005

Maliyyə Palatasından əhaliyə müraciət

2016-11-25 11:35:00

Maliyyə Bazarlarına Nəzarət Palatası (MBNP) ölkə vətəndaşlarını bəzi mətbuat orqanlarında yayılan yanlış məlumatlara inanmamağa çağırıb. Fins.az-ın məlumatına görə, bu çağırış, Palatanın bu gün yayılan açıqlamasında yer alıb.

Açıqlamada deyilir ki:

«Bəzi mətbuat orqanlarında Azərbaycan Respublikası Maliyyə Bazarlarına Nəzarət Palatasına istinadən “dövlətin əmanətlərin sığortalanması sistemindən çıxması” məzmunlu əsassız yazılar dərc edilmişdir. Bu məlumat həqiqəti əks etdirmir.

Əmanətlərin sığortalanması sistemi “Əmanətlərin sığortalanması haqqında” və “Əmanətlərin tam sığortalanması haqqında” Azərbaycan Respublikasının Qanunları tənzimlənir. “Əmanətlərin tam sığortalanması haqqında” Azərbaycan Respublikasının Qanununa  əsasən 2016-cı il martın 4-dən etibarən ölkə banklarındakı, qanunvericiliklə müəyyən edilmiş faiz dərəcəsi həddində olan fiziki şəxslərin bütün qorunan əmanətləri qarşıdakı 3 il müddətində tam sığortalanır. Azərbaycan Respublikasının Konstitusiyasının 149-cu maddəsinin 7-ci hissəsinə əsasən yalnız vətəndaşların hüquqi vəziyyətini yaxşılaşdıran normativ hüquqi aktların geriyə qüvvəsi vardır, digər bütün hallarda isə normativ hüquqi aktların geriyə qüvvəsi yoxdur.

Bankçılıq Forumunda çıxışı zamanı Maliyyə Bazarlarına Nəzarət Palatasının Direktorlar Şurasının sədri Rüfət Aslanlı Azərbaycanda bank əmanətlərinin sığortalanması sisteminin təkmilləşdirilməsinə və təkcə, əmanətçi olan vətəndaşların deyil, sahibkarların və biznesin vəsaitlərinin qorunmasına ehtiyac olduğunu bildirmişdir. O, həmçinin qeyd etmişdir ki, dövlət vəsaitləri hesabına Əmanətlərin Sığortalanması Fondunun əlavə kapitallaşmasına ehtiyac var. Yəni, Palata əmanətlərin sığortalanması sisteminin daha da təkmilləşdirilməsini və vətəndaşlarla yanaşı sahibkarlığın da maraqlarının qorunmasını təklif edir».

Palata vətəndaşları bəzi KİV-də çıxan yanlış məlumatlara etibar etməməyə, mətbuatı isə həssas məsələlərin işıqlandırılması zamanı daha diqqətli olmağa dəvət edib.

Maliyyə-biznes sektoru ilə bağlı məsələləri işıqlandıran mətbuat orqanı olaraq fins.az da Palatanın bu çağırışına qoşulur, bank sektoru üçün bu həssas dövrdə əhalini yanlış məlumatlara etibar etməməyə, belə məlumatları yayan mətbuat orqanlarını isə daha məsuliyyətli olaraq yayılan məlumatları təhrif etməməyə çağırır.

© Materiallardan istifadə edərkən hiperlinklə istinad olunmalıdır
+12°C
  • $ USD
    1.7430
  • € EUR
    1.8487
  • ₽ RUB
    0.0275