SƏNAYE

Azərbaycanda fermerlər almanı sata bilmir
03 SENTYABR
512

Azərbaycanda fermerlər almanı sata bilmir

2018-09-03 10:57:00

Şimal zonasının alma bağlarında yığım yavaş-yavaş başlayır.

Fins.az-ın məlumatına görə, Ərzaq məhsullarının tədarükü və təchizatı” ASC-nin İctimaiyyətlə Əlaqələr Şöbəsinin müdiri Nicat Nəsirli sosial şəbəkədə məlumat paylaşıb. 

Məlumatda deyilir ki, aqrotəqvimə görə, kütləvi yığım sentyabrın ikinci ongünlüyündə vüsət götürəcək, builki təsərrüfat mövsümündə ölkə üzrə 270 min tondan çox məhsul tədarükü gözlənilir.

Lakin bölgə fermerlərində bu qədər məhsulun daxili və xarici bazarlarda realizə olunması baxımından bəzi narahatlıqlar var:

1. Əsas xarici bazarımız olan Rusiyada maliyyə sabitliyi pozulub, Türkiyədən sonra bu ölkədə də dollar rubla nisbətdə kəskin bahalaşıb. Belə olan halda məhsulu ucuz rubla satıb xeyir əldə etmək mümkün olmayacaq. Elə indidən bir çox istehsalçılar Rusiyaya məhsul aparmağa tərəddüd edirlər. İri istehsalçılar məhsulu anbarlara yığıb bir müddət gözləməli olacaqlar ki, Rusiyadakı istehlakçılar yeni qiymət dəyişmələrinə inteqrasiya etsinlər. Saxlama imkanı olmayan kiçik fermerlər isə məhsulu dəyər-dəyməzinə satmalı olacaqlar. Bu qədər məhsulun kütləvi şəkildə daxili bazara girişi ucuzlaşmaya səbəb ola bilər.

2. Bu ilki iqlim şərtləri meyvə bağlarında keyfiyyətə ciddi təsir göstərib. Xüsusən, əsas alma istehsalçısı olan Qubada kiçik təsərrüfatların əksəriyyətində mövsüm ərzində bağlara dəfələrlə dərman səpilməsinə baxmayaraq dəmgil xəstəliyi məhsulların əmtəə görünüşünə öz zərbəsini vurub. İndidən demək olar ki, kiçik təsərrüfatlardakı almanın böyük əksəriyyəti emala getməlidir. Bağlardan xəstəliyin geniş yayılmasının digər səbəbləri dərmanların keyfiyyətsiz olması, bəzi fermerlərin kimyəvi dərmanlama işləri aparmamasıdır. 

İri istehsalçılar üçün 1-2 bir aylıq gözləmə dövrü olacaq: hazırda Rusiyanın cənub bölgələrində istehsal potensialı güclüdür, təxminən bir aydan sonra bu ölkədə yay mövsümü başa çatanda bazarlarda ciddi boşluq yarana bilər. O zaman rusiyalı istehlakçı bizim almamızı yeni qiymətlərlə qəbul etmək məcburiyyətində qalacaq.

Xırda istehsalçılların iqtisadi müdafiəsini isə xalq olaraq üzərimizə götürməliyik: hər bir fərd gündəlik alma istehlakını artırmalı, aidiyyatı dövlət qurumları isə emal müəssisələri ilə sıx əməkdaşlıq mühiti yaradaraq keyfiyyət göstəriciləri aşağı olan məhsulların emala cəlb olunmasına çalışmalıdır. 

Beləliklə, sentyabrın başlaması ilə yeni təsərrüfat mövsümü başlayır, şübhə etmirəm ki, almaçı fermerlərimizə əl uzatmağa gücümüz çatacaq!

Müəllif: Tuncay Türbəndəzadə

© Materiallardan istifadə edərkən hiperlinklə istinad olunmalıdır
  • $ USD
    1.7000
  • € EUR
    1.9326
  • ₽ RUB
    0.0255