"ABŞ ilə Çin arasındakı danışıqlar yenidən gərgin mərhələyə qədəm qoyub".
Fins.az xəbər verir ki, bu barədə iqtisadçı-ekspert Vüqar Bayramov rəsmi "facebook" hesabında yazıb. ABŞ tərəfindən 24 sentyabr tarixindən Çin mallarına tətbiqi nəzərdə tutulan rüsumların dünya iqtisadiyyatına təsirindən danışan ekspert bunları deyib:
"Tramp Administrasiyası gələn il 200 milyard dollarlıq Çin məhsullarına 10 faizlik gömrük vergisi tətbiq etmək niyyətindədir. ABŞ-ın Çin məhsullarına tətbiq edəcəyi vergi Asiyanın aparıcı iqtisadiyyatı üçün 0,7 faizlik mənfi təsir deməkdir. Rəsmi Pekin cavab addımları haqda düşünür. Bununla belə, reallıq bundan ibarətdir ki, Tramp adiminstrasiyasının yeni gömrük vergi siyasəti 2020-ci ildə yeni qlobal böhrana səbəb ola bilər. Belə ki, Ağ Ev Çin ilə yanaşı həmçinin öz müttəfiqləri olan Kanada və Avropa Birliyinə də yeni vergilər tətbiq edir. İldə 162,2milyard dollarlıq neft idxal edən Çin qlobal neft tələbinin 18,6 faizini formalaşdırır. Bu isə o deməkdir ki, Çin iqtisadiyyatının zəifləməsi neftə olan tələbin də azalmasına gətirib çıxaracaq".
İqtisadçı-ekspert Vüqar Bayramov
Qlobal ticarət müharibəsinin digər tərəfində olan ABŞ isə 139,1 milyard dollarlıq neft idxalı ilə bazara çıxarılan ümumi “qara qızıl”ın 15,9 faizini alır. Qlobal böhranın baş verəcəyi halda yenidən neftə tələb azalacaq və bu da 2020-ci ildə “qara qızıl”ın qiymətində enişlə müşahidə ediləcək. Digər tərəfdən, şist neft hasilatındakı artım fonunda OPEK + neft hasilatının gündəlik 1 milyon barel artırılması ilə bağlı bu yaykı qərarının davamı olaraq yenidən hasilatın çoxaltmağı düşünür. Bunlar isə neft bazarı üçün qiymət baxımından yaxşı nə isə vəd etmir. Bu arada, Rusiya Mərkəzi Bankının sədri də neftin 1 barelinin qiymətinin yaxın 2 ildə 55 dollaradək azalacağı ilə bağlı proqnozunu bölüşüb. Qlobal ticarət müharibləri və neft hasilatının artırılması fonunda yeni “neft şokunun” yaranması riskləri güclənməkdədir.
