2019-cu ildə “AccessBank” QSC-nin zərərinin təxminən 100 milyon manat təşkil edəcəyi gözlənilsə də, faktiki zərər proqnozdan aşağıdır.

Fins.az Bankın maliyyə göstəricilərinə istinadən xəbər verir ki, “AccessBank” 2019-cu ili 89 milyon 704 min manat xalis zərər ilə başa vurub.

Ötən ilin 9 ayında “AccessBank”ın xalis zərəri 90 milyon 501 min manat təşkil etmişdi. Beləliklə, Bank 4-cü rübdə mənfəət əldə edib və zərərini azaldıb.

2019-cu ildə “AccessBank”ın cəmi gəlirləri 123 milyon 811 min manat, cəmi xərcləri 110 milyon 29 min manat təşkil edib. Gəlirlər xərcləri üstələdiyindən Bankın 13 milyon 782 min manat əmliyyat mənfəəti yaranıb. “AccessBank” ötən il aktivlər üzrə mümkün zərərlərin ödənilməsi üçün xüsusi ehtiyatın yaradılmasına 103 milyon 486 min manat ayırdığından ili 89 milyon 704 min manat xalis zərər ilə bağlayıb.

Gəlirləri artıb

2018-ci ildə faiz gəlirləri 88 milyon 71 min manat ikən 2019-cu ildə 95 milyon 887 min manat təşkil edib. 2018-ci ildə qeyri-faiz gəlirləri üzrə 8 milyon 974 min manat zərər yarandığı halda 2019-cu ildə 27 milyon 924 min manat gəlir əldə edilib.

Qeyd edək ki, “AccessBank” 2018-ci ili 11 milyon 579 min manat zərər ilə bağlamışdı.

"Biznes plana əsasən, kapitallaşmanın baş tutduğu il ərzində (2019-cu il) bankın zərəri təxminən 100 milyon manat təşkil edəcək. Zərər ehtiyatların yaradılması ilə bağlıdır. Zəruri ehtiyatlar yaradıldığı üçün gələcəkdə kapitalımız üçün heç bir təhlükə yoxdur. “AccessBank” 2020-ci ildə birmənalı şəkildə mənfəətə çıxacaq",-  AccessBank-ın İdarə Heyəti sədrinin birinci müavini Yevgeniya Qaşikulina “Marja”ya müsahibəsində bildirmişdi.

Bank Böyüyüb

31 Dekabr 2019-cu il tarixində “AccessBank” 897 milyon 886 min manat cəmi aktivlərə malik olub və aktivlərin 536 milyon 428 min manatını xalis kreditlər və lizinqlər təşkil edib.

2018-ci ildə “AccessBank” 878 milyon 688 min manat cəmi aktivlərə malik idi və aktivlərin 542 milyon 488 min manatını müştərilərə verilən kreditlər təşkil etmişdi.

Depozit portfeli böyük məbləğdə artıb

2018-ci illə müqayisədə 2019-cu ildə “AccessBank”ın depozit portfeli 159 milyon 822 min manat artaraq 660 milyon 960 min manata yüksəlib.

2019-cu ilin sonunda “AccessBank” 76 milyon 90 min məcmu kapitala malik olub.