ABŞ-ın elektrik avtomobilləri üzrə iri şirkəti “Tesla” Çin bazarında satdığı 285 min avtomobili proqram təminatını yeniləmək üçün geri çağırmağa başlayıb.

Çinin Dövlət Bazar Tənzimlənməsi Administrasiyası müvafiq araşdırma apardıqdan sonra şirkət qarşısında avtomobillərin proqram təminatının yenilənməsi tələbini qoyub. Bildirilir ki, həmin avtomobillərin köməkçi idarəetmə texnologiyasındakı qüsurlar qəzalara səbəb ola bilər.

Şirkət avtomobillərin proqram təminatı pulsuz yeniləyir. Geri çağırılan avtomobillər həm idxal edilən, həm də Çində istehsal olunan “Model 3” və “Model Y” nəqliyyat vasitələridir.

Qeyd edək ki, son aylar Çində “Tesla” avtomobillərinin ölümlə nəticələnən qəzalarından sonra istehlakçılar arasında həmin nəqliyyat vasitələrindən şikayət halları çoxalıb. Şirkət Çində çox populyar olan “Tesla” avtomobilləri ilə bağlı şikayətləri təhlil etmək üçün data mərkəzi açmağı planlaşdırır.