2011-2023-cü illərdə Azərbaycanda orta illik iqtisadi artım tempi 1,5% olub. Bu dövr ərzində qeyri-neft-qaz sektoru daha yüksək bir artım tempi, yəni 4,4% nümayiş etdirib.

Fins.az xəbər verir ki, bu məlumatı iqtisadiyyat naziri Mikayıl Cabbarov "Bakı İqlim Fəaliyyəti Həftəsi" çərçivəsində təqdim edib.

Cari ilin ilk səkkiz ayında qeyri-neft-qaz sektorunda 7% iqtisadi artım müşahidə olunub. Nazir qeyd edib ki, son illərdə ölkəmizdə həyata keçirilən genişmiqyaslı sosial-iqtisadi islahatlar, ölkənin sosial-iqtisadi mənzərəsində əhəmiyyətli müsbət dəyişikliklər yaradaraq əhalinin rifah halını əhəmiyyətli dərəcədə yaxşılaşdırıb.

Neft-qaz sektorunda hasilatın azalmasına baxmayaraq, qeyri-neft-qaz sektorunda iqtisadi artımın müsbət dinamikası qorunub. Pandemiyadan sonrakı illərdə də iqtisadi artım davam edib. Bu prosesdə büdcə xərclərinin genişlənməsi, sahibkarlığa dəstək, investisiyaların və ixracın təşviqi, sənayenin inkişafı kimi sahələrdə aparılan struktur islahatları mühüm rol oynayıb.