Qeydiyyatdan keçmiş dərmanların istifadəsi faydaları risklərdən üstün olduqda təmin olunur - Səhiyyə Nazirliyi

Hər bir dərman vasitəsi qeydiyyata alınmazdan əvvəl həm klinikaya qədər, həm də klinik tədqiqatlardan keçir.

Fins.az xəbər verir ki, bu barədə “Sağlam radio”nun (93 FM) “Sağlam səhər” efirində Səhiyyə Nazirliyinin Analitik Ekspertiza Mərkəzi-nin Farmakonəzarət şöbəsinin müdiri Fərid Həsənov məlumat verib.

Məlumata görə, klinikaya qədər tədqiqatlar heyvanlar üzərində aparılır, klinik tədqiqatlar isə insanlarda həyata keçirilir. Tədqiqatlar zamanı dərmanın toksikoloji xüsusiyyətləri, effektivliyi və təhlükəsizliyi qiymətləndirilir. Fərid Həsənov bildirib ki, toksikoloji təsirlər dərmanın orqanizmə — qaraciyər, ürək, böyrək və digər orqanlara — olan potensial zərərlərini əhatə edir.

Effektivlik dərmanın müəyyən məqsədə nail olub-olmaması ilə ölçülür; dərman xəstəliyi müalicə etməli və ya simptomları aradan qaldırmalıdır. Hər bir dərman şirkəti qeydiyyat üçün tədqiqatlardan əldə etdiyi məlumatları Analitik Ekspertiza Mərkəzinə təqdim edir.

Qurum təqdim olunan məlumatları müxtəlif istiqamətli ekspertlər vasitəsilə qiymətləndirir və əgər dərmanın faydaları onun risklərindən üstün hesab olunursa, dərman qeydiyyata alınır və əczaçılıq bazarına daxil olur. Qeydiyyatdan sonra dərmanın təhlükəsiz istifadəsi Səhiyyə Nazirliyinin Farmakonəzarət şöbəsi tərəfindən təmin edilir.