Satınalmaların 60%-i ilin ikinci yarısında həyata keçirilib - Vüqar Gülməmmədov

Fins.az - Hesablama Palatası sədri Vüqar Gülməmmədov Milli Məclisin İqtisadi siyasət, sənaye və sahibkarlıq komitəsində çıxışı zamanı dövlət satınalmaları ilə bağlı 2025-ci ilin təhlil nəticələrini açıqlayıb.

Onun sözlərinə görə, aparılan təhlillər göstərir ki, satınalmalar il ərzində qeyri-bərabər paylanıb və əsas yük ilin ikinci yarısına düşüb. Xüsusilə III və IV rüblərdə cəmləşmə meyli daha qabarıq olub.

Satınalmaların vaxt bölgüsü

• Təxminən 60% satınalma ilin ikinci yarısında həyata keçirilib

• IV rübün payı 31,2% təşkil edib

• 1400-dən çox təşkilatdan 900-dən çoxu (təxminən 64%) satınalma fəaliyyətinə yalnız II rübdən başlayıb

• 130-a yaxın təşkilat ilk satınalmanı 6-cı ayda, 70-dən çox təşkilat isə 9-cu ayda aparıb

İcra göstəriciləri

Palata sədri bildirib ki, bağlanmış müqavilələrin icrasında da problemlər mövcuddur. Təhlillərə əsasən müqavilələrin təxminən 30%-i tam icra olunmayıb

İslahatlar və qiymətləndirmə

V.Gülməmmədov qeyd edib ki, son illərdə dövlət satınalmaları sahəsində şəffaflığın artırılması və elektron sistemlərin tətbiqi istiqamətində mühüm islahatlar aparılıb. Elektron satınalmaların həcmi artıb və ümumi satınalma mədəniyyətində müsbət dəyişikliklər müşahidə olunur.

Bununla belə, o vurğulayıb ki, yalnız proseslərin rəqəmsallaşdırılması kifayət etmir. Satınalan təşkilatların planlama və icra intizamı da mövcud problemlərin həllində əsas rol oynayır.

Ümumilikdə, Hesablama Palatasının açıqlaması dövlət satınalmalarında planlama və icra balansının hələ də tam formalaşmadığını göstərir.