Ceyhun Bayramov UNESCAP sessiyasına sədrlik edib – Bakı–Banqkok Bəyannaməsi qəbul olunub
Azərbaycan Respublikasının xarici işlər naziri Ceyhun Bayramov BMT-nin Asiya və Sakit Okean üzrə İqtisadi və Sosial Komissiyasının (UNESCAP) 82-ci sessiyasında iştirak etmək üçün Banqkoka səfər edib və sessiyaya sədrlik edib.
Fins.az-ın məlumatına görə, Xarici İşlər Nazirliyinin “X” sosial şəbəkəsində paylaşdığı məlumatda qeyd olunur ki, “Heç kimi geridə qoymamaq: Asiya və Sakit Okean regionunda bütün yaşlar üçün bir cəmiyyətin inkişaf etdirilməsi” mövzusuna həsr olunan sessiya layiqli iş, yaş qrupları üzrə tam və məhsuldar məşğulluq, qadınların iqtisadi səlahiyyətləndirilməsi və sosial inteqrasiya kimi məsələlərin müzakirəsi üçün platforma rolunu oynayıb.
Sessiya çərçivəsində Ceyhun Bayramov Tailandın Baş naziri Anutin Çarnvirakul ilə görüşüb. Görüşdə Azərbaycanın UNESCAP-a sədrliyi dövründə prioritetləri, Azərbaycan və Tailand arasında ikitərəfli münasibətlərin perspektivləri və regional məsələlər müzakirə olunub.
Sessiyanın açılışında Azərbaycan Prezidenti İlham Əliyev-in yazılı müraciəti nazir Ceyhun Bayramov tərəfindən səsləndirilib. Müraciətdə və çıxışlarda regional əməkdaşlığın gücləndirilməsi, inkişafın faydalarının cəmiyyətin bütün təbəqələrinə çatdırılması və inklüziv inkişafın əhəmiyyəti vurğulanıb.
Azərbaycan sessiyada inklüziv iqtisadi artım, rəqəmsal transformasiya, yaşıl enerji keçidi, regional bağlantılar, sülh quruculuğu və Cənub-Cənub əməkdaşlığına dair əsas siyasət mesajlarını təqdim edib. “Azərbaycan 2030” sosial-iqtisadi inkişaf prioritetləri çərçivəsində təhsil və səhiyyəyə bərabər çıxış, rəqəmsal xidmətlərin genişləndirilməsi və nəsillərarası imkan bərabərliyi kimi istiqamətlər də diqqətə çatdırılıb.
Sessiyanın mühüm nəticələrindən biri Asiya və Sakit okean regionunda bütün yaş qrupları üçün sosial inkişafın təşviqinə dair Bakı–Banqkok Bəyannaməsinin qəbul olunması olub. Bu sənəd inklüzivlik və davamlı inkişaf üzrə ortaq öhdəliyi əks etdirir və ESCAP gündəliyi ilə uyğunluq təşkil edir.
Ümumilikdə sessiya region üzrə inklüziv artım, sosial bərabərlik və dayanıqlı inkişaf mövzularında dialoqu gücləndirmək məqsədilə üzv dövlətləri, beynəlxalq təşkilatları və BMT tərəfdaşlarını bir araya gətirib. Azərbaycan isə çoxtərəfli diplomatiyada fəal iştirakını davam etdirərək Asiya-Sakit okean regionu ilə əməkdaşlığı daha da dərinləşdirməyə sadiq olduğunu bildirib.
