ARDNF dövlət büdcəsinə 173,6 milyard manatdan çox vəsait transfert edib
Azərbaycan Respublikası Dövlət Neft Fondu 2026-cı ilin 31 mart tarixinə qədər ümumilikdə 173,623 milyard manat həcmində vəsaiti dövlət büdcəsinə transfert edib.
Fins.az Fondun məlumatına əsasən xəbər verir ki, yalnız 2026-cı ilin yanvar-mart aylarında ARDNF-nin büdcəsinin icrası çərçivəsində dövlət büdcəsinə 3 milyard 210 milyon manat vəsait yönəldilib. Bu isə 2025-ci ilin eyni dövrü ilə müqayisədə 410,3 milyon manat və ya 11,3% azalma deməkdir.
Məlumata əsasən, ARDNF-nin aktivləri 2026-cı ilin əvvəlinə 73 milyard 541,5 milyon ABŞ dolları (125 milyard 20,5 milyon manat) təşkil edib. 2026-cı il martın 31-nə olan vəziyyətə isə Fondun aktivləri 73 milyard 515,9 milyon ABŞ dolları (124 milyard 976,9 milyon manat) səviyyəsində qeydə alınıb.
Hesabat dövründə Fondun ümumi gəlirləri 3 milyard 180 milyon manat təşkil edib. Bu məbləğin 1 milyard 803,1 milyon manatı neft-qaz gəlirlərinin payına düşüb. Eyni zamanda, vəsaitlərin idarə edilməsi fəaliyyətindən əldə olunan gəlirlər 1 milyard 376,8 milyon manat olub.
Qeyd olunur ki, qızıl qiymətlərinin dəyişməsi və valyuta məzənnələrindəki fərqlər nəticəsində formalaşan büdcədənkənar gəlirlər 2 milyard 117,9 milyon manat təşkil edib. Bununla yanaşı, investisiya portfelinin bazar dəyərindəki dəyişiklik fonunda investisiya gəlirləri üzrə 741,1 milyon manat həcmində azalma qeydə alınıb.
Hesabat dövründə ARDNF-nin büdcə xərcləri 3 milyard 223,5 milyon manat təşkil edib.
Qeyd edək ki, Dövlət Neft Fondu 29 dekabr 1999-cu ildə təsis edilib və neft-qaz gəlirlərinin toplanması, səmərəli idarə olunması və gələcək nəsillər üçün qorunmasını təmin edən xüsusi dövlət qurumudur.
