Süni intellekt logistika və ticarət sistemlərini dəyişdirir - Anar Ağayev
Nəqliyyat və yükdaşıma sektorunda rəqabətə davamlılıq getdikcə daha çox yalnız qiymət amili ilə deyil, həm də səmərəlilik, rəqəmsal həllərin tətbiqi və süni intellekt daxil olmaqla yeni texnologiyaların istifadəsi ilə müəyyən olunur.
Fins.az xəbər verir ki, bu barədə “Food City Agrocomplex” şirkətinin baş direktoru Anar Ağayev Bakıda keçirilən 2-ci Xəzər Beynəlxalq Nəqliyyat, Tranzit və Logistika Forumu çərçivəsində bildirib.
Onun sözlərinə görə, texnologiya təchizatçıları artıq beynəlxalq ticarət və biznes proseslərinə yanaşmanı dəyişdirən yeni həllər tətbiq edirlər. A.Ağayev qeyd edib ki, bu gün nəqliyyat və yükdaşımaların rəqabət qabiliyyəti təkcə qiymət baxımından deyil, daha çox səmərəlilik prizmasından qiymətləndirilməlidir.
O əlavə edib ki, süni intellekt də daxil olmaqla yeni texnologiyalar beynəlxalq ticarət və kommersiya sahəsində biznes sistemləri və təcrübələr üçün əlavə imkanlar yaradır və bu proses qlobal təchizat zəncirlərinin transformasiyasını sürətləndirir.
A.Ağayevin sözlərinə görə, hazırkı müzakirələr siyasət, rəqəmsal platformalar və innovasiyalar kimi istiqamətləri bir araya gətirir. Onun fikrincə, bu sahələr üzrə birgə fəaliyyət biznes mühitinin, beynəlxalq ticarətin və qlobal təchizat zəncirlərinin gələcəyinin formalaşmasına mühüm töhfə verə bilər.
Qeyd edək ki, 2-ci Xəzər Beynəlxalq Nəqliyyat, Tranzit və Logistika Forumu Bakıda keçirilən “TransLogistica Caspian 2026” sərgisi çərçivəsində təşkil olunub və dövlət qurumlarının, beynəlxalq təşkilatların və aparıcı logistika şirkətlərinin nümayəndələrini bir araya gətirir.
