Tramp: İranla razılaşma yaxın ola bilər

Fins.az - ABŞ ilə İran arasında danışıqların intensiv mərhələyə keçdiyi bildirilir.

Donald Trump bazar günü axşam jurnalistlərə açıqlamasında Vaşinqton və Tehran arasında birbaşa təmasların davam etdiyini və mümkün razılaşmanın yaxın ola biləcəyini deyib.

ABŞ prezidentinin sözlərinə görə, danışıqlar “son dərəcə yaxşı” gedir və yaxın zamanda nəticə əldə olunması ehtimalı var. Bununla belə, o, razılaşmanın baş tutmaması variantını da istisna etməyib və konkret vaxt çərçivəsi açıqlamayıb.

Tramp qeyd edib ki, son bir ay ərzində ABŞ tərəfindən həyata keçirilən zərbələr nəticəsində İranın yüksək vəzifəli rəsmiləri həlak olub və bu fonda regionda vəziyyət dəyişib. O, eyni zamanda Tehranda mümkün siyasi dəyişikliklərə də işarə edib.

Bununla yanaşı, İran tərəfi fevralın sonundan başlayan münaqişədən sonra ABŞ ilə birbaşa danışıqların aparıldığını əsasən təkzib edir və əvvəlcə hərbi əməliyyatların dayandırılmasının vacibliyini vurğulayır.

ABŞ prezidenti əlavə olaraq bildirib ki, İranın Hörmüz boğazından neft tankerlərinin keçidinə icazə verməsi danışıqlar prosesində müəyyən güzəşt kimi qiymətləndirilə bilər. Onun sözlərinə görə, yaxın günlərdə bir neçə iri neft tankerinin hərəkəti gözlənilir.

Yaxın Şərqdə hərbi-siyasi gərginlik isə davam edir. Həftəsonu Yəməndə fəaliyyət göstərən husilərin İsrailə hücumu münaqişənin genişlənə biləcəyinə dair narahatlıqları artırıb. Eyni zamanda İran və İsrail arasında qarşılıqlı zərbələr davam edir, ABŞ isə regionda hərbi mövcudluğunu gücləndirir.