Rusiya hökuməti ammonium nitratın ixracına qadağanın müddətini uzadıb
Rusiyada ammonium nitratın Avrasiya İqtisadi İttifaqından (Aİİ) kənara ixracına müvəqqəti qadağanı bir ay uzatdı
Fins.az RF-nin Nazirlər Kabinetinin mətbuat xidmətinə istinadən bildirir ki, hökumət ammonium nitratın Avrasiya İqtisadi İttifaqından kənara ixracına qoyulan qadağanın müddətini 2022-ci il mayın 1-dək uzadıb. Lakin bu qadağa DXR, LXR, Abxaziya və Cənubi Osetiyaya ixraca şamil edilmir.
Rusiya Nazirlər Kabineti Mətbuat xidmətinin yaydığı məlumatda deyilir: “Rusiyada ammonium nitratın Avrasiya İqtisadi İttifaqından kənara ixracına qoyulan müvəqqəti qadağa bir ay müddətinə uzadılır. İndi bu qadağa 2022-ci il mayın 1-dək qüvvədə olacaq. Fərmanı baş nazir Mixail Mişustin imzalayıb”.
"Qadağa Donetsk və Luqansk Xalq Respublikalarına, həmçinin Abxaziya və Cənubi Osetiyaya bu məhsulların ixracına şamil edilməyəcək", - deyə Nazirlər Kabinetindən bildiriblər.
Ammonium nitratın ixracına qadağa fevralın 1-dən tətbiq edilib və aprelin 1-dək qüvvədə olmalı idi.
Nazirlər Kabinetinin mətbuat xidməti xəbər verir ki, qadağanın müddətinin uzadılması Rusiya fermerlərinin və sənaye müəssisələrinin ehtiyaclarını tam ödəyəcək.
