Polşa ABŞ-yə daimi hərbi baza yaratmağı təklif edib

Fins.az - Polşa hökuməti ölkə ərazisində ABŞ qoşunları üçün daimi hərbi bazanın yaradılması ilə bağlı Vaşinqtona rəsmi təklif təqdim edib.

Bu barədə Polşanın müdafiə naziri Vladislav Kosinyak-Kamış məlumat verib. Onun sözlərinə görə, təklif ABŞ-nin müdafiə naziri Pit Heqsetə təqdim olunub.

Hazırda Polşa ərazisində əsasən rotasiya prinsipi ilə xidmət göstərən təxminən 10 min ABŞ hərbçisi yerləşir.

Varşava ABŞ-nin ölkədəki hərbi mövcudluğunu daha da gücləndirmək niyyətində olduğunu bildirib.

Polşa rəsmilərinin fikrincə, daimi hərbi baza regional təhlükəsizliyin möhkəmləndirilməsinə və NATO çərçivəsində əməkdaşlığın genişlənməsinə töhfə verə bilər.