Hindistan sərhəd təhlükəsizliyi üçün ilan və timsahlardan istifadəni araşdırır

Fins.az - Hindistan sərhəd təhlükəsizliyini gücləndirmək məqsədilə qeyri-adi üsulları nəzərdən keçirir. Məlumata görə, ölkənin Sərhəd Təhlükəsizliyi Qüvvələri çay və bataqlıq ərazilərdə ilan və timsahlardan istifadə imkanlarını araşdırır.

Söhbət əsasən Hindistan–Banqladeş sərhədində yerləşən, relyefi çətin olan və ənənəvi maneələrin qurulmasının mümkün olmadığı ərazilərdən gedir. Bu bölgələrdə çaylar və bataqlıqlar təhlükəsizlik tədbirlərini çətinləşdirir.

Rəsmi məlumatlara əsasən, Hindistanın Banqladeşlə sərhədi 4900 kilometrdən çoxdur. Qanunsuz miqrasiyanın qarşısını almaq üçün artıq bir çox hissədə sədlər inşa edilsə də, bəzi çətin keçilən ərazilərdə bu işlər hələ də tamamlanmayıb.