Deloitte: Enerji sektorunda qaliblər aşağı karbonlu və çevik təchizatlı şirkətlər olacaq

Deloitte şirkətinin Strategiya və Əməliyyatlar üzrə tərəfdaşı Alexios Zachariadis Bakı Enerji Həftəsinin ikinci günündə keçirilən panel müzakirəsində qlobal enerji bazarındakı mövcud vəziyyətlə bağlı fikirlərini açıqlayıb.

O bildirib ki, mövcud geosiyasi gərginliklər və regional münaqişələr enerji bazarına və enerji axınlarına birbaşa təsir göstərir. Bu şəraitdə şirkətlər daha dayanıqlı olmalı, yüksək qeyri-müəyyənlik mühitində çevik və qətiyyətli qərarlar qəbul etməlidirlər.

Zachariadis vurğulayıb ki, neft-qaz sektorunda uğur qazanan şirkətlər aşağı maya dəyəri və aşağı karbon intensivliyinə malik yataqlara üstünlük verən, həmçinin etibarlı təchizat zəncirinə və geniş bazar çıxışına sahib olanlar olacaq.

Onun sözlərinə görə, qeyri-müəyyənlik dövrlərində etibarlılıq mühüm kommersiya üstünlüyünə çevrilir. Xüsusilə qaz və LNG bazarında alıcılar daha çevik portfellərə, sabit öhdəlikləri yerinə yetirə bilən, kifayət qədər saxlama və nəqliyyat çevikliyi olan təchizatçılara üstünlük verirlər.

Ekspert əlavə edib ki, downstream sektorunun inkişafı yalnız istehsal gücünün artırılması ilə məhdudlaşmır. Əsas məqsəd emal aktivlərinin, neft-kimya məhsullarının, aviasiya yanacaqlarının və xüsusi məhsulların inteqrasiya olunmuş portfel çərçivəsində idarə olunmasıdır.

Onun fikrincə, gələcəkdə investisiyalar daha çox əlavə dəyər yarada bilən və qlobal təchizat zəncirində rəqabət üstünlüyü təmin edən sahələrə yönəlməlidir.

Zachariadis həmçinin dekarbonizasiya prosesinin vacibliyini vurğulayıb. O bildirib ki, karbon tutma və saxlanılması (CCS) texnologiyaları, hidrogen klasterlərinin inkişafı və enerji sistemlərinin karbonsuzlaşdırılması enerji sektorunun əsas istiqamətlərindəndir.

Sonda o qeyd edib ki, gələcəyin qalibləri kommersiya intizamını qoruyan, geosiyasi risklərə qarşı dayanıqlı olan və dəyişən bazar şərtlərinə sürətlə uyğunlaşa bilən şirkətlər olacaq.