Britaniyada Baş nazir Kir Starmerlə bağlı araşdırma təşəbbüsü gündəmə gətirilib

Fins.az - Böyük Britaniyanın Baş naziri Kir Starmer parlamentdə onun fəaliyyəti ilə bağlı mümkün araşdırmanın başlanmasına dair səsvermə ilə üzləşəcək.

Təşəbbüs Starmerin ABŞ-dəki sabiq Britaniya səfiri Piter Mandelsonun təyinatı ilə bağlı İcmalar Palatasına düzgün məlumat verib-vermədiyini müəyyənləşdirmək məqsədi daşıyır.

İcmalar Palatasının spikeri Lindzi Hoyl bildirib ki, müxalifətdə olan Mühafizəkarlar Partiyasının lideri Kemi Badenok tərəfindən irəli sürülən təklif təsdiqlənib və məsələ parlamentdə müzakirəyə çıxarılacaq. Səsvermə nəticəsində İmtiyazlar Komitəsinin bu məsələni araşdırıb-araşdırmaması müəyyən ediləcək.

Qeyd olunur ki, belə bir araşdırmanın başlanması Baş nazirin siyasi karyerasına ciddi təsir göstərə bilər. Əgər onun parlamenti bilərəkdən çaşdırdığı sübuta yetirilərsə, vəzifədə qalması çətinləşə bilər.