Almaniyada CEO maaşları 56% artıb – gəlir bərabərsizliyi dərinləşir

Fins.az - Almaniyada iri şirkət rəhbərlərinin maaşlarında kəskin artım qeydə alınıb.

Oxfam təşkilatının açıqladığı hesabata görə, DAX 40 siyahısına daxil olan şirkətlərin 25 baş icraçı direktorunun maaşı 2019-cu illə müqayisədə 56% yüksəlib.

Belə ki, orta illik gəlir 4,5 milyon avrodan təxminən 7 milyon avroya çatıb. Qlobal miqyasda isə CEO maaşları 2019–2025-ci illərdə 54% artaraq 8,4 milyon dollara yüksəlib.

Ekspertlər bildirir ki, bu məbləğə çatmaq üçün orta statistik işçinin 490 il işləməsi tələb olunur. Eyni dövrdə real əməkhaqlarının 12% azalması gəlir bərabərsizliyini daha da artırıb.

Almaniyada da vəziyyət fərqli deyil. İnflyasiya nəzərə alındıqda, adi işçilərin maaşları hələ də pandemiyadan əvvəlki səviyyədən aşağı qalır.

Oxfam bu tendensiyanın sosial və iqtisadi risklər yaratdığını vurğulayır. Bildirilir ki, artan inflyasiya fonunda ev təsərrüfatlarının alıcılıq qabiliyyəti zəifləyir, lakin top-menecerlərin gəlirləri sürətlə artır.

Təşkilat hökumətə super varlılar üçün vergilərin artırılmasını və minimum əməkhaqqının yüksəldilməsini tövsiyə edir.

Eyni zamanda, geosiyasi risklər də iqtisadiyyata təsir göstərir. Almaniyanın iqtisadi tədqiqat institutu ifo hesab edir ki, Yaxın Şərqdəki müharibə ölkənin iqtisadi artım tempini zəiflədə bilər.