ABŞ strateji neft ehtiyatlarını sürətlə azaldır

Fins.az - ABŞ İranla davam edən hərbi qarşıdurmanın yaratdığı tədarük risklərini azaltmaq məqsədilə Strateji Neft Ehtiyatlarından (SPR) neft buraxılışını sürətlə davam etdirir.

Bu barədə CNN məlumat yayıb.

Telekanalın xəbərinə görə, ABŞ Energetika Nazirliyinin açıqladığı son statistikaya əsasən, ötən həftə strateji ehtiyatlardan əlavə 8 milyon barel neft bazara çıxarılıb. Bir həftə əvvəl isə bu göstərici 9,1 milyon barel təşkil etmişdi.

Hazırda ABŞ-ın Strateji Neft Ehtiyatlarında 357,1 milyon barel neft qalır. Federal məlumatlara görə, bu həcm 2024-cü ilin yanvar ayından bəri qeydə alınan ən aşağı göstəricidir.

Javier Blas sosial şəbəkədə paylaşımında bildirib ki, mövcud buraxılış tempi davam edərsə, ehtiyatların həcmi gələn həftənin sonuna qədər əvvəlki administrasiya dövründə qeydə alınmış minimum səviyyədən də aşağı düşəcək.

Məlumata görə, İranla hərbi qarşıdurmanın başlanmasından indiyədək ABŞ strateji rezervlərdən təxminən 58 milyon barel neft istifadəyə verib. Bu, ümumi ehtiyatların təxminən 14 faizinə bərabərdir.

Ekspertlər qeyd edirlər ki, strateji ehtiyatların davamlı şəkildə azalması gələcəkdə mümkün enerji böhranları və ya qlobal tədarük problemləri zamanı ABŞ-ın bazara müdaxilə imkanlarını zəiflədə bilər.

Enerji bazarlarında qeyri-müəyyənliyin davam etdiyi bir vaxtda Vaşinqtonun ehtiyatlardan istifadə siyasəti həm neft qiymətləri, həm də qlobal enerji təhlükəsizliyi baxımından diqqətlə izlənilir.