Yaponiya şirkəti Azərbaycanda uzunmüddətli enerji əməkdaşlığının genişləndirilməsində maraqlıdır

INPEX Yaponiyanın Azərbaycanla uzunmüddətli enerji əməkdaşlığını yeni mərhələyə keçirmək niyyətində olduğunu açıqlayıb.

Şirkətin Avropa və Yaxın Şərq layihələri üzrə icraçı direktoru və baş vitse-prezidenti Munehiro Hosono Bakı Enerji Həftəsi çərçivəsində keçirilən paneldə çıxış edərək bildirib ki, INPEX enerji keçidinin yalnız siyasi deyil, həm də iqtisadi reallıqlar və enerji təhlükəsizliyi nəzərə alınmaqla həyata keçirilməsinin tərəfdarıdır. Bu yanaşma şirkətin “INPEX Vision 2032” strategiyasının əsasını təşkil edir.

Onun sözlərinə görə, karbon emissiyalarının nisbətən aşağı olması səbəbindən təbii qaz yaxın illərdə də, xüsusilə sabit enerji təchizatına ehtiyac olan regionlarda mühüm rol oynamaqda davam edəcək.

Hosono bildirib ki, INPEX-in strategiyası üç əsas istiqaməti əhatə edir: təbii qaz və enerji biznesinin genişləndirilməsi, karbon emissiyalarının azaldılmasına yönəlmiş texnologiyaların – o cümlədən karbonun tutulması və saxlanılması (CCS) və hidrogen layihələrinin inkişafı, həmçinin enerji sektorunda qabaqcıl texnologiyaların tətbiqi.

Şirkət nümayəndəsi qeyd edib ki, INPEX hasilat, mayeləşdirmə, daşınma və satış daxil olmaqla enerji dəyər zəncirinin bütün mərhələlərində fəaliyyət göstərir və bu sahədə Avstraliya və İndoneziyadakı iri LNG layihələri təcrübə nümunəsi kimi çıxış edir.

INPEX 2003-cü ildən Azəri-Çıraq-Günəşli yataqlar blokunun tərəfdaşıdır və layihədə təxminən 10% paya malikdir. Hosono bildirib ki, AÇG şirkət üçün mühüm və uzunmüddətli aktiv olaraq qalır.

Onun sözlərinə görə, yataqlar yetkin mərhələyə keçdikcə əməliyyat səmərəliliyi və resursların optimallaşdırılması daha da vacib olur. INPEX bu istiqamətdə həm mövcud layihələrin inkişafına, həm də yeni texnoloji həllərin tətbiqinə fokuslanır.

Şirkət rəsmisi əlavə edib ki, INPEX Azərbaycanı yalnız mövcud neft-qaz bazası kimi deyil, həm də böyük gələcək potensialına malik strateji tərəfdaş kimi qiymətləndirir və CCS, qaz və dəniz layihələri kimi sahələrdə əməkdaşlığın genişləndirilməsi üçün imkanlar görür.

INPEX sonda bildirib ki, şirkət məsuliyyətli enerji keçidinə sadiq qalaraq Azərbaycanla uzunmüddətli əməkdaşlığın yeni mərhələsini qurmağa hazırdır.