X sosial şəbəkəsi bu ölkədə fəaliyyətini dayandırır

İlon Maskın sahibi olduğu sosial şəbəkə X, məzmun tələblərinə əməl etməməsi səbəbindən Braziliyada ofisini bağlamağa qərar verib. Bu addım, Ali Məhkəmənin hakimi Aleksandra de Moraesin təzyiqləri ilə bağlıdır. Hakim, sosial şəbəkədən konkret məzmun tələblərini yerinə yetirməsini tələb edib, lakin X-in nümayəndələri bu tələbləri senzura kimi qiymətləndirir və ifadə azadlığının pozulması hesab edirlər.

Finss.az xəbər verir ki, X şirkəti işçilərinin təhlükəsizliyini təmin etmək məqsədilə Braziliyada fəaliyyətini dərhal dayandırma qərarı qəbul edib. Şirkət, hakim tərəfindən işçilərə həbs təhlükəsi ilə hədələndiyini və bu səbəbdən ofisinin bağlandığını bildirir. Problemin mərkəzində isə, sosial şəbəkənin siyasətinə zidd olmayan, amma müəyyən hesabların qadağan edilməsi ilə bağlı tələblər dayanır.

X-in Cənubi Amerikada, xüsusilə Braziliyada qarşılaşdığı çətinliklər bir müddətdir davam edir. Məsələn, avqust ayında Venesuela hakimiyyəti sosial şəbəkənin fəaliyyətini 10 gün dayandırmışdı. Eyni zamanda, Braziliyadakı məhkəmə prosesləri İlon Maskın ölkədəki seçkilərlə bağlı ifadə etdiyi fikirlərə görə daha da şiddətlənib.

Bütün bu problemlərə baxmayaraq, X sosial şəbəkəsi Braziliyada hələ də istifadəçilərin xidmətində qalacaq.