TotalEnergies: “Abşeron”da üç yeni quyu və yüksək hasilat planlaşdırılır

“TotalEnergies” şirkətinin Azərbaycandakı nümayəndəliyinin rəhbəri Emmanuel de Qiyebon Bakı Enerji Həftəsi çərçivəsində bildirib ki, “Abşeron” layihəsi yeni inkişaf mərhələsinə daxil olur.

Onun sözlərinə görə, layihənin ikinci fazası çərçivəsində üç yeni quyunun qazılması nəzərdə tutulur. Hər quyudan gündəlik təxminən 40 min barrel neft ekvivalentində hasilat gözlənilir ki, bunun 70 faizi qaz, 30 faizi isə kondensat təşkil edir.

Layihə çərçivəsində həmçinin təxminən 140 kilometrlik sualtı boru kəmərinin inşası planlaşdırılır. Bu infrastruktur hasilat quyularını birbaşa sahil obyektləri ilə birləşdirəcək və nəticədə platformasız işləmə modeli tətbiq olunacaq.

Şirkət nümayəndəsi qeyd edib ki, layihədə müasir axın idarəetmə texnologiyaları tətbiq ediləcək. Bunlara aşağı izolyasiyalı boru kəmərləri, çoxfazalı nəqliyyat sistemi, MEG (monoetilen qlikol) vurulması və boru kəmərlərinin pigging sistemi ilə avtomatik təmizlənməsi daxildir.

Bu texnologiyalar hasilatın fasiləsiz aparılmasına, əməliyyat səmərəliliyinin artırılmasına və infrastrukturun daha uzunmüddətli işləməsinə imkan yaradacaq.