Neft-qaz layihələrində yeni inkişaf strategiyası həyata keçirilir
Fins.az - NEQSOL Holding-in tərkibində fəaliyyət göstərən Nobel Upstream Böyük Britaniya, Azərbaycan və ABŞ-da neft-qaz layihələrini həyata keçirən müstəqil kəşfiyyat və hasilat şirkəti kimi fəaliyyətini davam etdirir.
Şirkətin məlumatına görə, Nobel Upstream Nobel Oil E&P (UK) Ltd. tərəfindən idarə olunan şirkətlər qrupunun ticarət adıdır. Qrup Böyük Britaniyada qeydiyyatdan keçib, baş ofisi Londonda yerləşir. Texniki və kommersiya komandaları isə Bakı və ABŞ-ın Texas ştatının Hyuston şəhərində fəaliyyət göstərir.
Bildirilib ki, şirkətin hazırda Azərbaycanın Xəzər dənizində, Böyük Britaniyanın Şimal dənizində və ABŞ-ın Texas ştatındakı Perm hövzəsində müxtəlif mərhələlərdə olan enerji layihələri mövcuddur. Nobel Upstream bu regionlarda həm qazma işləri, həm də yeni investisiya imkanları hesabına üzvi inkişaf strategiyasını davam etdirir.
Məlumata görə, şirkət təcrübəli idarəetmə, məqsədyönlü satınalmalar və strateji tərəfdaşlıqları özünü doğrultmuş texnologiyalarla birləşdirərək neft və qaz ehtiyatlarının təhlükəsiz və səmərəli işlənməsini təmin etməyə çalışır. Böyük Britaniya və ABŞ-da əsas diqqət yetkin neft yataqlarının inkişafına yönəldilir, Azərbaycanda isə layihələrin mərhələli icrası və ehtiyatların qiymətləndirilməsi prioritet təşkil edir.
Qeyd olunub ki, Nobel Upstream 2014-cü ildə Nobel Oil-in kəşfiyyat və hasilat fəaliyyətinin Böyük Britaniyada yeni korporativ struktur altında birləşdirilməsi nəticəsində formalaşıb. Nobel Oil isə neft sənayesində fəaliyyətə 2005-ci ildə başlayıb və ilk upstream aktivini 2008-ci ildə əldə edib.
Hazırda şirkət Böyük Britaniya və ABŞ-dakı aktivlərlə yanaşı, "Ümid" və "Babək" yataqlarının işlənməsi üzrə Risk Xidmət Sazişinin operatoru olan Umid Babek Operating Company (UBOC) şirkətində 20 faiz paya malikdir.
Şirkət fəaliyyətini beynəlxalq enerji bazarında yeni investisiya imkanlarının qiymətləndirilməsi və mövcud layihələrin inkişafı istiqamətində davam etdirir.
