“Cənub Qaz Dəhlizi” QSC maliyyə dayanıqlığını qoruyur – “Moody’s”

“Cənub Qaz Dəhlizi” QSC-nin (Cənub Qaz Dəhlizi QSC) likvidliyinin növbəti 12–18 ay ərzində yüksək səviyyədə qalacağı proqnozlaşdırılır.

Fins.az xəbər verir ki, bu barədə beynəlxalq reytinq agentliyi Moody’s məlumat yayıb.

Agentliyin qiymətləndirməsinə əsasən, bu sabitlik 2025-ci ilin sonuna olan vəziyyətə görə təxminən 2,8 milyard ABŞ dolları həcmində mövcud pul vəsaiti və SOCAR Capital LLC ilə xəzinədarlıq sazişi çərçivəsində saxlanılan 1,5 milyard ABŞ dolları məbləğində əlavə likvidliklə dəstəklənir.

“Moody’s” qeyd edir ki, bu vəsaitlər və əməliyyat fəaliyyətindən əldə olunacaq pul axınları şirkətə kapital xərclərini və orta həcmli borc öhdəliklərini daxili mənbələr hesabına problemsiz qarşılamağa imkan verəcək.

Agentliyin məlumatında bildirilir ki, planlaşdırılan dividend ödənişləri yüksək pul vəsaiti generasiyası və əhəmiyyətli likvidlik ehtiyatları fonunda şirkətin maliyyə vəziyyətinə mənfi təsir göstərməyəcək. Eyni zamanda suveren zəmanətlərin təkrar maliyyələşdirmə risklərini azaltdığı və ehtiyac yarandığı halda əlavə dövlət dəstəyinin mümkünlüyü vurğulanır.

Analitiklərin qiymətləndirməsinə görə, SGC formal maliyyə hədəfləri müəyyən etməsə də, beynəlxalq maliyyə institutları ilə əməkdaşlıq fonunda balanslaşdırılmış maliyyə siyasətini davam etdirir.

“Moody’s” əlavə edir ki, Cənub Qaz Dəhlizi QSC maliyyə siyasətinin təkmilləşdirilməsi istiqamətində prosesləri davam etdirir və qərarların balanslaşdırılmış şəkildə qəbul olunacağı gözlənilir.

Həmçinin bildirilib ki, XRG-nin minoritar səhmdar kimi planlaşdırılan iştirakı korporativ idarəetmənin güclənməsinə töhfə verə bilər.

Qeyd edək ki, bundan əvvəl Moody’s SGC-yə xarici və milli valyutada uzunmüddətli emitent reytinqlərini Baa3 səviyyəsində, baza kredit qiymətləndirməsini isə baa3 səviyyəsində təyin edib. Proqnoz isə müsbət olaraq qiymətləndirilib.