BTC ilə indiyədək 556 milyon tona yaxın Azərbaycan nefti nəql olunub

Bakı-Tbilisi-Ceyhan (BTC) neft ixracı boru kəmərinin Azərbaycan hissəsinin istifadəyə verilməsindən bu günə qədər kəmərlə təqribən 556 milyon ton Azərbaycan mənşəli neft nəql edilib.

Fins.az-ın Energetika Nazirliyinə istinadən verdiyi məlumata görə, bu gün BTC neft ixracı boru kəmərinin Azərbaycan hissəsinin istifadəyə verilməsinin 21-ci ildönümü tamam olur.

Məlumata əsasən, BTC kəməri Azərbaycanın enerji resurslarının beynəlxalq bazarlara çıxarılmasında mühüm rol oynamaqda davam edir.

Dövlət Statistika Komitəsinin məlumatına görə, 2026-cı ilin yanvar-aprel aylarında Bakı-Tbilisi-Ceyhan kəməri ilə nəql olunan tranzit neftinin həcmi 8 milyon 389,5 min ton təşkil edib. Bu göstərici ötən ilin eyni dövrü ilə müqayisədə 925,2 min ton və ya 9,9% azdır.

Xatırladaq ki, 2025-ci ilin yanvar-aprel aylarında BTC vasitəsilə 9 milyon 314,7 min ton neft nəql olunmuşdu.

Hesabat dövründə ölkə üzrə ümumi neft nəqletməsinin 77,0%-i məhz BTC kəmərinin payına düşüb. Kəmərlə daşınan neftin 82,4%-ni və ya 6 milyon 914,3 min tonunu Azərbaycanda hasil olunan neft təşkil edib. Qalan 17,6% və ya 1 milyon 475,2 min ton isə Türkmənistan və Qazaxıstandan daxil olan neftin payına düşüb.

Hazırda Bakı-Tbilisi-Ceyhan boru kəməri əsasən Azəri–Çıraq–Günəşli yatağından hasil olunan nefti və Şahdəniz yatağından əldə edilən kondensatı dünya bazarlarına nəql edir.