Azərbaycanda şəkər ixracında böyük artım

Fins.az - 2026-cı ilin yanvar ayında Azərbaycan qeyri-neft məhsullarının ixracı artaraq 251,96 milyon dolları ötüb.

Xüsusilə şəkər və şəkərdən hazırlanmış qənnadı məmulatları önəmli artım göstərib.

Dövlət Gömrük Komitəsinin məlumatına görə, yanvar ayında ölkədən 3,9 milyon dollar dəyərində 6 min tondan çox şəkər və qənnadı məhsulu ixrac olunub. Bu, 2025-ci ilin eyni dövrü ilə müqayisədə dəyər ifadəsində 2,7 dəfə, həcm baxımından isə 2,8 dəfə çoxdur.

Cari ilin ilk ayında ümumilikdə Azərbaycan mənşəli qeyri-neft məhsullarının ixracı 251,96 milyon dolları keçib ki, bu da ötən ilin müvafiq göstəricisindən 10,3% yüksəkdir. Hesabat dövründə qənnadı məmulatlarının ixracının xüsusi çəkisi 1,55% təşkil edib.

Ekspertlər hesab edir ki, qeyri-neft sektoru üzrə belə artım iqtisadi şaxələndirməni gücləndirir və Azərbaycan məhsullarının beynəlxalq bazarlarda rəqabət qabiliyyətinin yüksəlməsini göstərir.