Azərbaycanda mebel bazarı urbanizasiya və tikinti artımı ilə böyüyür
Son illərdə qonaq otağı və yumşaq mebel (divan, kreslo, stol-stul və s.) seqmentində həm qlobal, həm də Azərbaycan bazarında artım müşahidə olunduğu bildirilir.
Fins.az xəbər verir ki, qlobal bazarın həcmi 2025-ci ildə təxminən 231,8 milyard ABŞ dolları təşkil edib, 2026-cı ildə isə 240,4 milyard dollara çatacağı gözlənilir. Bu artımın istehlakçıların ev dizaynına və interyerə daha çox investisiya etməsi ilə bağlı olduğu qeyd olunur.
Məlumata görə, Azərbaycanda urbanizasiya, yeni tikililərin artması və interyer dizayna marağın yüksəlməsi qonaq otağı mebellərinə tələbi gücləndirir. Qonaq otağı mebellərinin ümumi bazarda ən böyük paya malik seqmentlərdən biri olduğu, xüsusilə divan və kresloların satışda əsas yer tutduğu vurğulanır.
Bildirilib ki, yalnız oturma mebelləri 2025-ci ildə qlobal bazarda 113 milyard dollardan çox gəlir yaradıb. Azərbaycanda isə bu seqmentdə yerli istehsalçılarla yanaşı Embawood və Kalidad Mebel kimi şirkətlər, həmçinin B&B Italia, Flexform və Ligne Roset kimi premium dünya markaları aktiv fəaliyyət göstərir.
Qeyd olunur ki, divanlar qonaq otağının əsas elementi hesab olunur və həm funksionallıq, həm də estetik baxımdan seçilir. Müasir dövrdə modular, transformasiya olunan və dərin oturacaqlı divan modellərinə üstünlük verilir. 2026-cı il trendlərinə əsasən, yumşaq formalar, təbii rənglər və fərdi dizayn imkanları ön plana çıxır. Azərbaycanda bu tip divanların qiyməti orta seqmentdə 800–2500 manat, premium modellərdə isə 3000–10000+ manat arasında dəyişir.
Eyni zamanda kresloların həm funksional, həm də dekorativ element kimi istifadə olunduğu bildirilir. Xüsusilə aksent kresloların interyerə fərdilik qatdığı və son illərdə daha çox tələb gördüyü qeyd olunur. Yerli bazarda kresloların qiyməti 200–1200 manat, premium idxal modellərində isə 1500–5000 manat civarındadır.
Qonaq otağı üçün stol-stullar və kofe masalarının da bazarın mühüm hissəsini təşkil etdiyi vurğulanır. Bu kateqoriyada multifunksional və saxlama bölməli modellərin populyarlıq qazandığı, xüsusilə kompakt mənzillər üçün üstünlük təşkil etdiyi bildirilir. Azərbaycanda bu məhsulların qiyməti 150–1500 manat aralığında dəyişir.
Məlumata görə, modern və klassik yumşaq mebellər arasında seçim əsasən istehlakçı zövqündən asılıdır. Modern mebellərin minimal dizayn və açıq rənglərlə seçildiyi, klassik mebellərin isə daha ağır materiallar və tünd tonlarla fərqləndiyi qeyd olunur. Azərbaycanda klassik dəstlərin qiyməti 2000–8000 manat, modern dəstlər isə 1000–4000 manat arasında dəyişir.
Bildirilib ki, son illərdə xüsusi dizaynlı (custom-made) mebellərə maraq artıb. İstehlakçıların fərdi ölçü, material və rəng seçimlərinə üstünlük verdiyi, bu seqmentdə qiymətlərin 1500 manatdan başlayaraq 10 000 manatdan yuxarı olduğu qeyd olunur.
Eyni zamanda lüks qonaq otağı mebeli seqmentinin əsasən idxal məhsulları hesabına formalaşdığı bildirilir. İtaliya və Fransa istehsalı olan mebellərin yüksək keyfiyyətli materiallar və eksklüziv dizaynla seçildiyi, bu kateqoriyada qiymətlərin 5000–50 000 manat və daha yüksək səviyyəyə çata bildiyi vurğulanır.
Ümumilikdə, qonaq otağı və yumşaq mebel bazarının həm qlobal, həm də Azərbaycan miqyasında stabil artım nümayiş etdirdiyi qeyd olunur. İstehlakçıların artıq yalnız funksionallığa deyil, həm də dizayn, komfort və fərdiləşdirməyə üstünlük verdiyi bildirilir.
