Azərbaycanda elektrik enerjisi istehsalının həcmi açıqlanıb

Bu ilin yanvar–aprel aylarında Azərbaycanda 8 milyard 527,6 milyon kilovat-saat elektrik enerjisi istehsal edilib.

Fins.az xəbər verir ki, bu barədə Dövlət Statistika Komitəsi məlumat yayıb.

Məlumata əsasən, bu göstərici 2025-ci ilin eyni dövrü ilə müqayisədə 262,2 milyon kilovat-saat və ya 3 faiz azalma deməkdir.

Eyni zamanda istehsal olunmuş elektrik enerjisinin 8 milyard 273,6 milyon kilovat-saatı əmtəəlik elektrik enerjisinin payına düşüb. Bu göstərici ötən ilin eyni dövrü ilə müqayisədə 211,8 milyon kilovat-saat və ya 2,5 faiz azdır.

Qeyd edilib ki, 2026-cı ilin yanvar–aprel aylarında elektrik enerjisi, qaz və buxar istehsalı, bölüşdürülməsi və təchizatı sektorunda ümumilikdə 1 milyard 322,7 milyon manat dəyərində məhsul istehsal olunub və xidmətlər göstərilib.

Eyni dövrdə su təchizatı, tullantıların təmizlənməsi və emalı sektorunda istehsal olunan məhsulların həcmi 201 milyon manat təşkil edib.