Azərbaycan Avropaya qaz tədarükünü genişləndirir, hazırda 16 ölkəyə çatdırılır – Orxan Zeynalov

Azərbaycan ABŞ tərəfdaşları ilə enerji və nəqliyyat sahəsində yeni əməkdaşlıq imkanlarını araşdırır.

Fins.az xəbər verir ki, bu fikirləri Azərbaycan energetika nazirinin müavini Orxan Zeynalov ABŞ-Azərbaycan Ticarət Palatasının 30 illiyinə həsr olunmuş ticarət və biznes konfransında səsləndirib.

O.Zeynalov bildirib ki, Azərbaycan Avropaya təbii qaz tədarükünü davam etdirir, yanvar ayında təchizat coğrafiyası Almaniya və Avstriyaya genişləndirilib, hazırda qaz alan ölkələrin sayı 16-ya çatıb. O, ABŞ-ın davamlı ikitərəfli dəstəyini və Prezident Donald Trampın Cənub Qaz Dəhlizi layihəsinin tamamlanmasında rolunu vurğulayıb.

Energetika nazirinin müavini əlavə edib ki, Azərbaycan amerikalı tərəfdaşlarla yeni əməkdaşlıq imkanlarını öyrənir, SOCAR ilə uzunmüddətli uğurlu əməkdaşlıq bu sahədə irəliləyiş üçün təməl rolunu oynaya bilər. O, həmçinin Mərkəzi Asiyadan Cənubi Qafqaz vasitəsilə Avropaya və Yaxın Şərqə nəqliyyat dəhlizlərinin geniş imkanlar təqdim etdiyini qeyd edib.

O.Zeynalov bildirib ki, növbəti üç il ərzində şəbəkəyə 2 giqavatt yaşıl enerji inteqrasiya olunacaq, 2033-cü ilə qədər isə əlavə 6-7 giqavatt enerji ixrac edilə və ya məlumat mərkəzlərində istifadə oluna biləcək. O, Azərbaycanın enerji xərclərinin regionda nisbətən aşağı olduğunu və tranzit dəhlizləri sayəsində tərəfdaşlara əlavə imkanlar təqdim etdiyini də vurğulayıb.