Avropaya qaz tədarükünü artırmaq üçün uzunmüddətli maliyyə və siyasət dəstəyi lazımdır - Pərviz Şahbazov
Ötən il Azərbaycan 25,2 milyard kubmetr təbii qaz ixrac edib və bunun təxminən 51 faizi Avropaya, qalan 49 faizi isə Türkiyə, Gürcüstan və Suriyaya göndərilib.
Fins.az xəbər verir ki, bunu Azərbaycanın energetika naziri Pərviz Şahbazov bu gün Bakıda keçirilən Cənub Qaz Dəhlizi Məşvərət Şurası nazirlərinin 12-ci iclası və Yaşıl Enerji Məşvərət Şurası nazirlərinin 4-cü iclası çərçivəsində çıxışı zamanı bildirib.
Nazir vurğulayıb ki, əgər Cənub Qaz Dəhlizinin birinci mərhələsinə göstərilən real dəstək sonrakı mərhələlərə də tətbiq olunsaydı, Avropaya qaz tədarükünün ikiqat artırılması artıq reallıq olardı.
O əlavə edib ki, Azərbaycan Avropa üçün etibarlı təchizatçı olaraq qalır və ölkənin qazına tələbat yüksəkdir:
"Lakin genişlənmə ilə bağlı tələb tərəfdən institusional və maliyyə dəstəyi hələ də kifayət deyil. Enerji təhlükəsizliyi yalnız təchizatçının üzərinə düşə bilməz. Biz 2026–2029-cu illər arasında istismara verilməsi planlaşdırılan dörd upstream layihəni irəlilədirik. Bu il 'Azəri-Çıraq-Günəşli' yatağından ilk təbii sərbəst qazın hasilatı gözlənilir. Bununla yanaşı, quruda və dənizdə dörd yeni kəşfiyyat layihəsi həyata keçirilir."
Pərviz Şahbazov həmçinin Birləşmiş Ərəb Əmirliklərinin Cənub Qaz Dəhlizində səhmdar qismində iştirakını mühüm müsbət hadisə kimi qiymətləndirib:
"Lakin bu kimi müsbət inkişaflara baxmayaraq, Avropaya qaz həcmlərinin əhəmiyyətli dərəcədə artırılması üçün konkret maliyyə mexanizmləri ilə dəstəklənən aydın və uzunmüddətli siyasət çərçivəsi tələb olunur. Karbohidrogenlər qlobal enerji təchizatında hələ də mühüm yer tutur, bərpa olunan enerji isə şəbəkə məhdudiyyətləri ilə üzləşir. Buna görə də enerji dilemmasını dərinləşdirən yanaşmalardan imtina etməli və təbii qaza yönəlik realist, investisiya əsaslı strategiya qəbul etməliyik."
