“Anglo Asian Mining” Azərbaycanda gümüş hasilatını artırıb – 42 min unsiyanı keçib

Fins.az - Azərbaycanda qiymətli metalların hasilatı ilə məşğul olan Anglo Asian Mining plc 2026-cı ilin birinci rübü üzrə gümüş istehsalında artım qeydə alıb.

Şirkətin açıqladığı məlumatlara görə, hesabat dövründə ümumi gümüş hasilatı 42 796 unsiya təşkil edib. Bu göstərici 2025-ci ilin eyni dövründə qeydə alınmış 30 315 unsiya ilə müqayisədə əhəmiyyətli artım deməkdir.

İstehsal strukturuna gəlincə, hasilatın 5 607 unsiyası dore qızıl külçələrinin tərkibində olan gümüşün payına düşüb. Qalan 37 189 unsiya isə flotasiyanın və SART texnologiyası ilə emal proseslərinin nəticəsində əldə olunub.

Şirkət eyni zamanda uzunmüddətli inkişaf strategiyasını davam etdirir. Belə ki, 2030-cu ilədək Xarxar yatağı, Qaradağ yatağı və Zəfər yatağı kimi yeni yataqların istismara verilməsi planlaşdırılır. Bu layihələr artıq fəaliyyətə başlayan Gilar yatağı və Dəmirli yatağı ilə birlikdə şirkətin hasilat portfelini genişləndirəcək.

Qeyd edək ki, şirkətin strategiyası çərçivəsində əsas diqqət mis istehsalının artırılmasına yönəldilsə də, gümüş və qızıl hasilatı da paralel şəkildə inkişaf etdirilir.