ABŞ iqtisadiyyatı I rübdə 2% artıb, proqnozdan aşağı qalıb

Fins.az - ABŞ iqtisadiyyatı 2026-cı ilin birinci rübündə illik hesabla 2 faiz artım göstərib. Bu barədə ölkənin Ticarət Nazirliyi məlumat yayıb.

Beləliklə, artım tempi əvvəlki rüblə müqayisədə sürətlənib. 2025-ci ilin son rübündə bu göstərici 0,5 faiz təşkil etmişdi.

Bununla belə, nəticə analitiklərin gözləntilərindən aşağı olub. Ekspertlər ilin ilk üç ayında ÜDM-in 2,3 faiz artacağını proqnozlaşdırırdılar.

Hesabata görə, ABŞ iqtisadiyyatının əsas hissəsini təşkil edən istehlak xərcləri 1,6 faiz artıb. Dövlət xərcləri 4,4 faiz yüksəlib, biznesin əsas kapitala investisiyaları isə 8,7 faiz artım göstərib.