Brent markalı neftin qiyməti 96,66 dollara yüksəlib

Fins.az - Cümə günü səhər saatlarında dünya bazarında neft qiymətləri mülayim artım nümayiş etdirib. Bazarda əsas diqqət Yaxın Şərqdəki vəziyyətə yönəlib.

Məlumata görə, Londonun ICE Futures birjasında Brent markalı neftin iyun fyuçerslərinin qiyməti 0,74 dollar (0,77%) artaraq 96,66 dollara çatıb. Əvvəlki sessiyada isə bu göstərici 1,17 dollar (1,2%) artaraq 95,92 dollar təşkil edib.

Eyni zamanda, Nyu-York əmtəə birjasında (NYMEX) WTI markalı neftin may fyuçersləri 0,45 dollar (0,46%) bahalaşaraq 98,32 dollara yüksəlib. Bu marka üzrə əvvəlki ticarət sessiyasında qiymət 3,46 dollar (3,7%) artaraq 97,87 dollar olub.

Bununla belə, həftəlik nəticələrə görə hər iki neft markası üzrə qiymətlərin 10 faizdən çox ucuzlaşa biləcəyi qeyd olunur. Bu isə 2025-ci ilin iyun ayından bəri ən kəskin həftəlik eniş kimi qiymətləndirilir.