Fins.az-ın media tərəfdaşlığı ilə Bakıda keçirilən “Beynəlxalq Maliyyə və Bankçılıq Sammiti 2026” uğurla başa çatıb
Bakı şəhərində 9–10 iyun 2026-cı il tarixlərində təşkil olunan “Beynəlxalq Maliyyə və Bankçılıq Sammiti 2026: Türk Dövlətlərinin Qlobal Maliyyə İnteqrasiyası” uğurla yekunlaşıb. İki gün davam edən sammit region ölkələrinin maliyyə və bank sektorunun aparıcı nümayəndələrini bir araya gətirərək qlobal maliyyə inteqrasiyası, rəqəmsal transformasiya və müasir bankçılıq trendləri üzrə geniş müzakirələrə ev sahibliyi edib.
Tədbirin media tərəfdaşı ölkənin aparıcı iqtisadi-media platformalarından biri olan “Fins.az” xəbər portalı olub. Sammit çərçivəsində baş tutan çıxışlar, panel müzakirələri və əməkdaşlıq təşəbbüsləri Fins.az tərəfindən operativ və analitik formada işıqlandırılaraq geniş auditoriyaya çatdırılıb.
Fins.az – Azərbaycanın etibarlı iqtisadi media platforması
“Biznesin nəbzini tut!” devizi ilə fəaliyyət göstərən Fins.az 18 oktyabr 2013-cü ildə təsis edilib və qısa müddətdə ölkənin aparıcı iqtisadi-media platformalarından birinə çevrilib. Portal iqtisadiyyat, maliyyə və biznes sahələrində operativ, dəqiq və analitik məzmun təqdim edərək etibarlı informasiya mənbəyi kimi mövqeyini möhkəmləndirib.
Fins.az maliyyə, sənaye, kənd təsərrüfatı, turizm, avtomobil, əmlak, nəqliyyat, İKT və digər strateji sahələr üzrə gündəlik xəbərlər, təhlillər, müsahibələr və bazar icmalları yayımlayır. Portalın əsas prioriteti obyektivlik, operativlik və peşəkar jurnalistika prinsiplərinə sadiqlikdir.
Portal dövlət qurumları, maliyyə institutları və biznes subyektləri ilə sıx əməkdaşlıq edərək ölkədə iqtisadi proseslərin geniş ictimaiyyətə çatdırılmasına mühüm töhfə verir, eyni zamanda sahibkarlıq mühitinin inkişafı və iqtisadi maarifləndirməni dəstəkləyir. Fins.az VT Company şirkətinə məxsusdur və bu əməkdaşlıq platformanın strateji inkişafına və biznes auditoriyası ilə effektiv kommunikasiya qurulmasına imkan yaradır.
Sammitin əsas istiqamətləri
Sammit Türkdilli Dövlətlərin Bank Assosiasiyaları Şurası, Azərbaycan Respublikasının Mərkəzi Bankı, Azərbaycan Banklar Assosiasiyası və region ölkələrinin maliyyə qurumlarının dəstəyi ilə təşkil olunub.
İki gün ərzində keçirilən müzakirələrdə bankçılıqda rəqəmsal transformasiya, açıq bankçılıq, süni intellekt əsaslı həllər, kibertəhlükəsizlik, AML/CFT mexanizmləri, yaşıl maliyyə və investisiya imkanları kimi mövzular diqqət mərkəzində olub.
Xüsusilə ikinci gün kibertəhlükəsizlik, fırıldaqçılığa qarşı mübarizə və komplayens ekosistemlərinin inkişafı üzrə keçirilən panel sessiyaları ilə yadda qalıb.
Regional əməkdaşlıq və nəticələr
Sammitin ilk günündə Azərbaycan Fintex Assosiasiyası ilə Mərkəzi Asiya Fintex Assosiasiyası arasında əməkdaşlıq memorandumu, eləcə də VISA ilə Azərbaycan Milli Olimpiya Komitəsi və digər tərəfdaşlar arasında mühüm razılaşmalar imzalanıb.
Fins.az-ın informasiya dəstəyi ilə geniş ictimai rezonans
İki gün davam edən sammit boyunca Fins.az-ın media tərəfdaşlığı tədbirin informasiya yükünü daşıyaraq çıxışların və müzakirələrin geniş auditoriyaya çatdırılmasına imkan yaradıb. Bu əməkdaşlıq Bakıda keçirilən beynəlxalq maliyyə sammitinin həm ölkə daxilində, həm də region səviyyəsində daha geniş tanıdılmasına töhfə verib.
