Azərbaycanın ÜDM-i 2031-ci ildə 105 milyard dolları keçəcək - BVF
Qeyri-neft sektoru artımı davam edir, neft hasilatı azalır
Beynəlxalq Valyuta Fondu (BVF) Azərbaycanın iqtisadiyyatının 2026-cı ildə 2,2% artacağını, 2027–2031-ci illərdə isə artımın sabit şəkildə 2,5% səviyyəsində qalacağını proqnozlaşdırır.
BVF-nin yeni hesabatına əsasən, ölkənin neft və qaz hasilatı və emalını əhatə edən neft sektoru 2026-cı ildə 2% azalacaq. Sonrakı illərdə isə azalma tempi tədricən zəifləyərək 2027–2031-ci illərdə təxminən 0,5% səviyyəsinə enəcək.
Qeyri-neft sektoru iqtisadi artımın əsas drayveri olacaq
Hesabatda qeyd olunur ki, qeyri-neft ÜDM 2026-cı ildə 3,7%, 2027-ci ildə 3,8% artacaq. 2028–2031-ci illərdə isə artımın orta hesabla 3,5% səviyyəsində sabitləşəcəyi gözlənilir.
BVF analitikləri bildirir ki, iqtisadiyyatın şaxələndirilməsi istiqamətində atılan addımlar qeyri-neft sektorunun dayanıqlı artımını təmin edir.
Nominal ÜDM-in davamlı artımı proqnozlaşdırılır
BVF-nin proqnozlarına görə, Azərbaycanın nominal ÜDM-i növbəti illərdə davamlı artım göstərəcək:
2026: 78,372 milyard dollar
2027: 83,060 milyard dollar
2028: 88,175 milyard dollar
2029: 93,718 milyard dollar
2030: 99,600 milyard dollar
2031: 105,923 milyard dollar
BVF: Neft hasilatının azalması artımı yavaşladacaq
Fondun qiymətləndirməsinə görə, karbohidrogen hasilatındakı azalma iqtisadi artım perspektivlərinə müəyyən təzyiq göstərir. Buna baxmayaraq, qeyri-neft sektorunun artımı bu təsiri qismən kompensasiya edir.
BVF vurğulayır ki, orta müddətli perspektivdə neft hasilatının azalması ümumi iqtisadi artımın təxminən 2,5% səviyyəsinə qədər yavaşlamasına səbəb olacaq.
