Avro ciddi ucuzlaşa bilər
Fins.az - ABŞ prezidenti Donald Trump İranla müharibənin “təxminən dörd həftə” davam edə biləcəyini bildirib.
Lakin Euronews telekanalında çıxış edən ekspertlər xəbərdarlıq edirlər ki, münaqişə daha uzun sürərsə, avro ciddi şəkildə ucuzlaşa bilər.
İqtisadçı Daniel Stelter belə bir ssenaridə hətta resessiya ehtimalını da istisna etmir.
Fevralın sonunda başlayan İran müharibəsi enerji daşıyıcılarının qiymətlərinin artmasına səbəb olub. Buna səbəb İranın dünya ticarəti üçün mühüm marşrut olan Hormuz Boğazını blokadaya almasıdır. Nəticədə neft, benzin, dizel və qazın qiymətləri yüksəlib.
Enerji qiymətlərinin artması xüsusilə kimya və metallurgiya kimi enerji tutumlu sənayelərə təsir edir və onsuz da qeyri-stabil vəziyyətdə olan Almaniya iqtisadiyyatına əlavə təzyiq yaradır. Bu fonda avro da zəifləyib və dollara qarşı 2% ucuzlaşıb.
İqtisadçılar hesab edir ki, müharibə uzanarsa, investorlar daha təhlükəsiz hesab edilən ABŞ dollarına yönələcək. Bu isə avronun daha da ucuzlaşmasına gətirib çıxara bilər.
ING Bankın baş iqtisadçısı Carsten Brzeski bildirib ki, əgər Hormuz boğazının blokadası bir neçə həftə davam etsə, neftin qiyməti bir barel üçün 100 dolları keçə bilər.
Bu halda avro/dollar məzənnəsi 1,10–1,12 səviyyəsinə qədər düşə bilər, yəni avro hazırkı səviyyə ilə müqayisədə təxminən 5–8% dəyər itirə bilər.
Belə ssenari Avropada ABŞ-a səyahətləri, idxal olunan malları və enerjini daha da bahalaşdıracaq.
Daniel Stelter isə daha pessimist proqnoz verir. Onun sözlərinə görə, ən pis halda avro dollar qarşısında paritetdən də aşağı – 0,90–0,95 dollar səviyyəsinə qədər enə bilər.
