AİB Azərbaycanda dövlət maliyyə institutları üçün yeni islahat proqramı hazırlayır

Asiya İnkişaf Bankı (AİB) Azərbaycanın da daxil olduğu dövlət maliyyə institutlarının kommersiyalaşdırılması və dayanıqlığının artırılması üzrə yeni proqramın həyata keçirilməsini nəzərdən keçirir.

Fins.az-ın AİB-ə istinadən məlumatına görə, layihənin maliyyələşdirilməsi 400 min ABŞ dolları məbləğində Xüsusi Texniki Yardım Fondu və 100 min ABŞ dolları məbləğində Maliyyə Sektorunun İnkişafı üzrə Tərəfdaşlıq Xüsusi Fondu hesabına planlaşdırılır.

Regional texniki yardım proqramı Asiya-Sakit okean regionunda dövlət maliyyə institutlarının kommersiyalaşdırılması və investisiya cəlbediciliyinin artırılması sahəsində tədqiqatların aparılmasını və analitik işlərin həyata keçirilməsini nəzərdə tutur.

Bundan əlavə, təşəbbüs dövlət maliyyə institutlarının AİB və digər beynəlxalq maliyyə tərəfdaşları ilə əməkdaşlıq imkanlarının genişləndirilməsi, həmçinin institusional potensialın gücləndirilməsi məqsədi daşıyır.

Proqramın əsas məqsədi dövlət maliyyə institutlarının maliyyə dayanıqlığının artırılması və regionda investisiya imkanlarının genişləndirilməsinə töhfə verməkdir.

Layihə Azərbaycanla yanaşı, Asiya və Sakit okean regionunun bir sıra ölkələrini də əhatə edir.