Yay mövsümündə daha estetik görünüş üçün brakioplastika imkanı

Fins.az – Baku Medical Plaza (BMP) Babək filialı pasiyentlərə beynəlxalq standartlara uyğun tibbi xidmətlərlə yanaşı, estetik cərrahiyyə sahəsində də müxtəlif müalicə və əməliyyat imkanları təqdim edir.

Klinikanın məlumatına görə, zamanla yaşlanma, sürətli çəki itkisi və ya genetik amillər nəticəsində qol nahiyəsində yaranan sallanmalar estetik narahatlığa səbəb ola bilər. Bu hallarda tətbiq edilən brakioplastika (qol gərmə əməliyyatı) vasitəsilə artıq dəri və piy toxuması xaric edilir, qolların daha sıx, konturlu və estetik görünüş əldə etməsi hədəflənir.

Bildirilib ki, əməliyyat qol nahiyəsinin formasının yaxşılaşdırılmasına və bədən proporsiyalarının daha harmonik görünməsinə kömək edir. Bu səbəbdən xüsusilə yay mövsümündə açıq geyimlərdən rahat istifadə etmək istəyən şəxslər tərəfindən bu estetik prosedura maraq göstərilir.

Müasir tibbi infrastruktur

2011-ci ildən fəaliyyət göstərən və sonradan BMP Babək filialı kimi inkişaf etdirilən klinika beynəlxalq standartlara uyğun tibbi xidmətlərin tətbiqi məqsədilə yaradılıb. Hazırda klinika 25 min kvadratmetrlik qapalı sahədə fəaliyyət göstərir.

Məlumata əsasən, tibb müəssisəsində 200 çarpayılıq stasionar, 25 reanimasiya çarpayısı, laminar hava axını sistemi ilə təchiz olunmuş 15 əməliyyat otağı, 5 doğum əməliyyatı otağı və yenidoğulmuşlar üçün 25 küveyzlik reanimasiya bölməsi fəaliyyət göstərir.

Qadın və uşaq sağlamlığı üzrə xidmətlər

Klinikanın nəzdində fəaliyyət göstərən Qadın və Uşaq Sağlamlıq Mərkəzi ümumi qadın sağlamlığı, normal və riskli hamiləliklərin müşahidəsi, açıq və laparoskopik ginekoloji əməliyyatlar, həmçinin sidikqaçırma və digər ginekoloji problemlərin müalicəsi istiqamətində xidmət göstərir.

Bundan əlavə, mərkəzdə Pediatriya və Neonatologiya şöbələri, eləcə də müasir avadanlıqlarla təchiz olunmuş VIP pediatriya stasionarı fəaliyyət göstərir.

Yenidoğulmuşların intensiv terapiyası

BMP-nin Yenidoğulmuşlar Reanimasiya və İntensiv Terapiya şöbəsində körpələr 24 saat ərzində yüksəkixtisaslı həkim və tibb bacılarının nəzarətində saxlanılır. Şöbədə ağır vəziyyətdə olan yenidoğulmuşların müalicəsi üçün reanimasiya zalı, infeksiya bölməsi və izolyasiya otaqları da mövcuddur.

Beləliklə, Baku Medical Plaza Babək filialı müasir tibbi infrastrukturu, geniş xidmət spektri və estetik cərrahiyyə imkanları ilə pasiyentlərə kompleks tibbi xidmət göstərən özəl tibb müəssisələrindən biri kimi fəaliyyətini davam etdirir.