Prezident İlham Əliyev: Şəhərsalma Azərbaycanın bütün şəhərləri üçün gündəlik prioritetdir
Bakı həm qədimlik, həm yenilik, həm tarixi irsin qorunması, həm də müasir şəhərsalma inkişafı baxımından Azərbaycanın memarlıq zənginliyini aydın şəkildə nümayiş etdirir.
Fins.az xəbər verir ki, bu sözləri Prezident İlham Əliyev Ümumdünya Şəhərsalma Forumunun 13-cü Sessiyasının (WUF13) açılış mərasimində çıxışı zamanı deyib. Dövlət başçısı vurğulayıb ki, bu, Azərbaycanın tarixi və memarlıq irsinin qorunub saxlanılmasında ulu babaların istedadının göstəricisidir.
Prezident qeyd edib ki, şəhərsalma təkcə Bakı üçün deyil, Azərbaycanın bir çox şəhərləri üçün gündəlik diqqət tələb edən mühüm sahədir. Onun sözlərinə görə, bu sahə ölkədə davamlı şəkildə inkişaf etdirilir və prioritet istiqamətlərdən biridir.
“Şəhərsalma nəinki Bakı üçün, bir çox Azərbaycan şəhərləri üçün elə bir məsələdir ki, biz gündəlik əsaslarla onun üzərində işləyirik”, – deyə dövlət başçısı bildirib. O əlavə edib ki, bu il Azərbaycanda “Şəhərsalma və memarlıq ili” elan olunub.
Prezident İlham Əliyev həmçinin WUF13-ün nəticələrinin COP29 kimi uğurlu olacağına ümid etdiyini bildirib və forumun qlobal şəhərsalma gündəliyinə mühüm töhfə verəcəyini qeyd edib.
Dövlət başçısı xatırladıb ki, 2022-ci ildən etibarən UN-Habitat ilə birgə Ağdam, Zəngilan və Xankəndidə üç Milli Şəhərsalma Forumu təşkil olunub. Onun sözlərinə görə, bu ərazilər uzun illər işğal altında qalıb və hazırda genişmiqyaslı bərpa prosesi gedir.
Prezident həmçinin Azərbaycanın qədim şəhərlərinə toxunaraq Bakı, Qəbələ və Şəkinin tarixi və mədəni əhəmiyyətini vurğulayıb. O qeyd edib ki, Şəkinin Kiş kəndində yerləşən kilsə dünyanın ən qədim kilsələrindən biri hesab olunur, Lahıc qəsəbəsindəki orta əsr kanalizasiya sistemi isə bu gün də fəaliyyətini davam etdirir.
Dövlət başçısı vurğulayıb ki, Azərbaycan xalqı öz qədim tarixi ilə qürur duyur və bu irs həm memarlıq abidələrində, həm də mədəni ənənələrdə yaşayır. O əlavə edib ki, şəhərsalmanın inkişafı xüsusilə paytaxt şəhərləri üçün strateji əhəmiyyət daşıyır və bu sahədə balanslı yanaşma vacibdir.
