May ayında Azərbaycanda axtarış sistemlərinin bazar payları açıqlanıb

2026-cı ilin may ayında "Google" Azərbaycanın bütün platformalarında, o cümlədən kompüter, noutbuk, mobil cihaz və planşetlərdə axtarış sistemləri bazarında lider mövqeyini qoruyub.

Fins.az-ın "Global Stats" statistika mərkəzinə istinadən verdiyi məlumata görə, hesabat dövründə "Google"un bazar payı 94,19 faiz təşkil edib. Bu göstərici aprel ayı ilə müqayisədə 9,03 faiz bəndi artıb.

Azərbaycanın axtarış sistemləri bazarında ikinci yerdə qərarlaşan "Yandex"in bazar payı isə 7,6 faiz bəndi azalıb. Nəticədə şirkətin bazar payı 4,61 faiz səviyyəsində olub.

Siyahıda üçüncü yeri tutan "Bing"in bazar payı da azalma nümayiş etdirib. Belə ki, hesabat dövründə bu göstərici 1,32 faiz bəndi geriləyərək 0,65 faizə enib.

May ayında "DuckDuckGo"nun bazar payı 0,18 faiz bəndi azalaraq 0,19 faiz təşkil edib.

İlk beşliyi tamamlayan "Yahoo"nun bazar payı isə əvvəlki ayla müqayisədə 0,09 faiz bəndi azalaraq 0,13 faizə düşüb.

Beləliklə, may ayında Azərbaycanın axtarış sistemləri bazarında "Google" dominant mövqeyini daha da gücləndirib, digər əsas oyunçuların bazar paylarında isə azalma qeydə alınıb.