bp-SOCAR-Özbəkistan layihəsində yeni mərhələ: seysmik tədqiqatlar bitir

Fins.az - bp-nin hasilat və əməliyyatlar üzrə icraçı vitse-prezidenti Qordon Birrel Bakı Enerji Həftəsi çərçivəsində jurnalistlərə açıqlamasında bildirib ki, Özbəkistan Respublikasının Şimali Üstyurd regionunda həyata keçirilən kəşfiyyat işləri üzrə seysmik tədqiqatlar bu yay mövsümünün sonunadək başa çatdırılacaq.

Layihə SOCAR və Uzbekneftegaz ilə imzalanmış hasilatın pay bölgüsü sazişi (HPBS) çərçivəsində icra olunur və Şimali Üstyurdun altı əsas kəşfiyyat blokunu — Boyterak, Terengquduq, Birqori, Haroy, Qoraqalpoq və Qulboy sahələrini əhatə edir.

Qordon Birrel qeyd edib ki, növbəti mərhələdə toplanmış seysmik məlumatların emalı və interpretasiyası aparılacaq. Bu proses gələn ilin sonunadək davam edəcək və regionda neft-qaz ehtiyatlarının mövcudluğu, eləcə də onların potensial həcmi barədə daha dəqiq nəticələr əldə etməyə imkan verəcək.

Rəsmi açıqlamaya görə, bu mərhələ Şimali Üstyurd regionunun enerji potensialının qiymətləndirilməsi və gələcək investisiya qərarları baxımından həlledici əhəmiyyət daşıyır. Layihə həmçinin regionda yeni kəşfiyyat və hasilat imkanlarının formalaşdırılması üçün baza rolunu oynayır.