Avropada aviayanacaq ehtiyatları azalır

Fins.az - Avropada aviayanacaq ehtiyatlarının azalması fonunda regionun Yaxın Şərqdən tədarükə asılılığı ilə bağlı narahatlıqlar artır.

Məlumata görə, Avropa ölkələri vəziyyəti sabit saxlamaq üçün ABŞ və Asiyadan reaktiv yanacaq idxalını artırıb, neft emalı zavodlarında istehsal həcmini yüksəldib və mövcud ehtiyatlardan istifadə edib. Buna baxmayaraq, region Yaxın Şərqdəki gərginlik səbəbindən mümkün təchizat fasilələrinə qarşı həssas olaraq qalır.

Xüsusilə Böyük Britaniya, Fransa və Almaniya risk qrupunda göstərilir. Bildirilir ki, bu ölkələrdə uzun illər ərzində neft emalı zavodlarının sayının azalması onların Hörmüz boğazı vasitəsilə Yaxın Şərqdən gətirilən yanacağa daha çox bağlı olmasına səbəb olub.