ABŞ fond bazarları düşüşdə: S&P 500 yarım ilin minimumuna enib

Fins.az - ABŞ fond bazarlarında həftənin son ticarət günü mənfi dinamika ilə yekunlaşıb. Əsas indekslər arasında S&P 500 yarım ilin ən aşağı səviyyəsinə enib, Nasdaq və Dow Jones indeksləri də həftəni itkilərlə başa vurub.

Həftə ərzində S&P 500 indeksi 1,9 faiz, Nasdaq və Dow Jones isə 2 faizdən çox dəyər itirib. İnvestorların diqqəti əsasən Yaxın Şərqdə artıq üç həftədir davam edən gərginliyə yönəlib.

Bazar iştirakçıları hesab edir ki, regionda baş verən hadisələr fonunda neft qiymətlərinin artması ABŞ-da inflyasiyanı sürətləndirə bilər. Bu isə Federal Ehtiyat Sisteminin cari ildə faiz dərəcələrini aşağı salmaq planlarını çətinləşdirə bilər.

Eyni zamanda, bəzi xəbərlərdə ABŞ administrasiyasının İranın neft ixracı üçün strateji əhəmiyyət daşıyan obyektlərə qarşı addımlar üzərində işlədiyi bildirilir. Bu isə qlobal enerji bazarında qeyri-müəyyənliyi daha da artırır.

Bununla belə, enerji sektorunda fəaliyyət göstərən iri şirkətlərin səhmləri nisbətən sabit qalıb və hətta müəyyən artım qeydə alınıb. Bu da artan neft qiymətlərinin həmin şirkətlərin gəlirlərinə müsbət təsiri ilə izah olunur.