Ölkənin enerji sektorunda yeni dəyər yaratmaq mümkündür - Asif Zeynalov

Fins.az - GL Group-un Baş icraçı direktoru və Məşvərət Şurasının sədri Asif Zeynalov Bakı Enerji Həftəsinin ikinci günündə keçirilən panel müzakirəsində çıxış edib.

O bildirib ki, Azərbaycanda yetkin neft-qaz yataqları hələ də böyük potensiala malikdir və düzgün yanaşma ilə bu aktivlərdən əlavə dəyər əldə etmək mümkündür.

Zeynalovun sözlərinə görə, bu potensialın reallaşdırılması üçün əsas amillər müasir texnologiyaların tətbiqi, əməliyyat intizamının gücləndirilməsi, səmərəli kapital bölgüsü və təşkilati imkanların inkişafıdır.

O həmçinin Azərbaycanın Orta Dəhliz üzərində yerləşən strateji mövqeyinin ölkəyə logistika və təchizat zənciri sahəsində mühüm üstünlüklər verdiyini qeyd edib. Onun sözlərinə görə, bu üstünlüklər yeni enerji layihələrinin icrası üçün əlverişli mühit formalaşdırır və investorlara mövcud infrastruktura əsaslanaraq daha az ilkin xərclə fəaliyyət imkanı yaradır.

Zeynalov əlavə edib ki, Azərbaycan artıq sabit və etibarlı tərəfdaş kimi regionda öz mövqeyini möhkəmləndirib və bu da beynəlxalq şirkətlərin marağını artırır.

Onun fikrincə, növbəti mərhələdə əməkdaşlığın genişləndirilməsi və texnoloji yanaşmaların gücləndirilməsi ilə regionda daha böyük dəyər yaratmaq mümkündür.