Neft qiymətləri yüksəlir: Brent və WTI bahalaşaraq üç ayın ən yüksək həftəlik artımına yaxınlaşır

Finss.az xəbər verir ki, dünya bazarında neft qiymətləri artmaqda davam edir və həftəni son üç ayın ən güclü qazancı ilə başa vurmağa hazırlaşır.

Brent markalı neftin noyabr fyuçersləri 0,14% artaraq 69,52 dollar/barelə yüksəlib. Bu, London ICE Futures Exchange birjasında Moskva vaxtı ilə saat 08:10-da qeydə alınıb. Xatırladaq ki, cümə axşamı Brent nefti 0,16% bahalaşaraq 69,42 dollar olmuşdu.

 ABŞ-da WTI markalı neftin noyabr fyuçersləri isə 0,31% artaraq 65,18 dollar/barel səviyyəsinə çatıb. Bu, New York əmtəə birjası (NYMEX) üzrə elektron ticarət zamanı qeydə alınıb. Qeyd edək ki, əvvəlki sessiyada WTI cüzi olaraq – 0,02% ucuzlaşaraq 64,98 dollar/barel səviyyəsində idi.

Neft qiymətlərindəki artım qlobal tələbin bərpası, OPEC+ istehsal siyasətinə bağlılıq və geosiyasi qeyri-müəyyənliklər fonunda baş verir. Analitiklər hesab edirlər ki, yaxın günlərdə də qiymətlərdə sabit artım müşahidə oluna bilər.